“Modimolle-monster” in hof

Die verhoor van Johan Kotzé, die sogenaamde “Modimolle-monster”, en sy drie medebeskuldigdes sal na verwagting Dinsdag in die hooggeregshof in Pretoria voortgaan.

Kotzé word daarvan beskuldig dat hy drie mans gehuur het om sy eksvrou Ina Bonnette te verkrag en te martel. Kotzé het glo ook Bonnette se seun, Conrad (19), doodgeskiet. Andries Sithole, Piet Mohlane en Frans Mphaka het Bonnette glo verkrag. Die hof het tydens Kotzé se vorige verskyning gehoor dat hy en Bonnette glo ‘n ooreenkoms gehad het dat sy met drie mans sou seks hê. Francois van As, vir Mohlane en Mphaka, het gesê sy kliënte is ingelig dat Kotzé en Bonnette ‘n ooreenkoms aangegaan het dat sy met drie swart mans sou seks hê en dat hy dit vir haar sou reël. “Dit is wat Kotzé vir my gesê het,” het Sithole gesê. Volgens Van As wou sy kliënte weet waarom hulle met Bonnette seks moes hê en het Kotzé aan hul gesê sy vrou kry nie genoeg by hom nie, hy is te vet en hy verdink haar van ontrouheid. Volgens Van As wou sy kliënte nie met Bonnette seks hê nie. Hulle wou hul geld hê vir die dag se arbeid, en huis toe gaan.