Minstens 20 seuns is die afgelope ses dae dood nadat hulle inisiasieskole in Mpumalanga bygewoon het.
Kol. Leonard Hlathi, woordvoerder van die polisie, sê die sterftes was by inisiasieskole in Belfast, KwaMhlanga, Kwaggafontein, Verena en Middelburg. Hlathi sê die polisie het sake van moord geopen en dat niemand is nog in hegtenis geneem is nie. Hy sê die polisie is besig om verklarings af te neem waarna dit aan die nasionale direkteur van openbare vervolging voorgelê sal word vir ʼn besluit oor hoe om die saak verder te hanteer. Collins Chabane, minister in die presidensie, het in ʼn verklaring sy hartseer oor die dood van jongmense by inisiasieskole uitgespreek. Hy sê die seuns het inisiasieskole bygewoon in die hoop om volwasse mans te word. “Ons doen ʼn beroep op tradisionele leiers om saam met die regering te werk om die betreurenswaardige verlies van lewens te voorkom.”