Motorfietsryer glo in padwoedevoorval doodgeskiet

Die motorfietsryer se ligaam lê in die pad. Foto: EWN via Twitter

Die motorfietsryer se ligaam lê in die pad. Foto: EWN via Twitter

ʼn Motorfietsryer is Vrydagoggend in North Riding in Johannesburg doodgeskiet tydens ʼn vermeende padwoedevoorval.

“Die motorfietsryer is net na 07:00 in Malibongwerylaan doodgeskiet,” het Edna Mamonyane, ʼn woordvoerder van die Johannesburgse metropolisie, aan Maroela Media gesê. Mamonyane het bevestig dat die motorfietsryer ʼn 44-jarige man in ʼn sedan by die Bounderyweg-kruising gekonfronteer het en dat albei mans gewapen was.

“Die man in die sedan het vermoedelik die motorfietsryer net daar doodgeskiet en is ook in die proses gewond.” Sy het gesê dit is in die stadium nog nie bekend op die motorfietsryer op die bestuurder geskiet het nie. Dit is ook nog nie duidelik waaroor die mans baklei het nie, en dit vorm deel van die polisie se ondersoek.

Santi Steinmann, ʼn woordvoerder van Netcare 911, het gesê die bestuurder van die sedan is in ʼn ernstige toestand aangetref. “Hy is op die toneel gestabiliseer en na ʼn nabygeleë hospitaal geneem vir verdere behandeling,” het sy gesê.

Volgens Mamonyane is die man onder die polisie se toesig. Die polisie en metropolisie was teen 10:00 nog op die toneel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.