Motorfietsryer sterf in botsing

ʼn 45-jarige man is dood nadat sy motorfiets Saterdagaand teen ʼn motor gebots het in Springs aan die Oos-Rand.

Volgens ER24 is die man van sy motorfiets geslinger en het hy sowat 15 meter verder in die pad gelê. Hy het ernstige kop- en bekkenbeserings opgedoen en is op die toneel dood verklaar. Een van die drie insittendes van die motor het ligte beserings opgedoen. Volgens paramedici het die motorfiets agter die motor en in dieselfde rigting gery toe die botsing plaasgevind het. Die presiese oorsaak van die ongeluk is egter nog nie bekend nie en word ondersoek.