Niemand nog vas na moord op Limpopo-boer

Niemand is nog in hegtenis geneem na die moord op ʼn boer van Limpopo wie se lyk Woensdagoggend gevind is nie.

ʼn Polisiewoordvoerder, lt. Kol. Ronel Otto, sê daar is geen nuwe leidrade na die moord op Dou Brummer (50) van die plaas Goedgedacht in die Dwaalboom-gebied nie. Otto sê werkers van Brummer het Woensdagoggend omstreeks 6:00 op sy lyk afgekom waar dit op die grasperk voor sy huis gelê het. Brummer is in die agterkop geskiet. Die polisie vermoed Brummer is Dinsdagaand geskiet nadat hy by die huis gekom het. Otto sê Brummer se selfoon en wapens is gesteel. Brummer het alleen op die plaas gebly.