Nóg 12 renosters gestroop

Nóg 12 renosters is die afgelope week vir hul horings doodgemaak, het die departement van omgewingsake bekendgemaak.

ʼn Woordvoerder van die departement, Albi Modise, sê 171 renosters is reeds vanjaar vir hul horings doodgemaak. Dié getal het verlede week Woensdag op 159 renosters gestaan. Volgens die departement is 103 renosters reeds vanjaar in die Krugerwildtuin gestroop. In Limpopo is 23 renosters gestroop, in KwaZulu-Natal is 18 renosters gestroop en in Noordwes is 17 renosters reeds vanjaar vir hul horings doodgemaak. Die departement het ʼn beroep gedoen op Suid-Afrikaners om renosterstropery aan te meld by 0800 205 005.