'n Italiaanse energiemaatskappy het nog 'n groot hoeveelheid aardgas langs die kus van Mosambiek ontdek. Foto: arabianoilandgas.com
Die Italiaanse energiemaatskappy, ENI, het Woensdag aangekondig dat die maatskappy aardgas van ongeveer 10 triljoen kubieke voet naby die kus van Mosambiek ontdek het.
Die nuwe veld is in die Rovuma-kom naby Cabo Delgado geleë. Die gas lê op ʼn diepte van 5 000 meter onder seevlak en sal na raming ENI se Mamba-velde met 52 triljoen kubieke voet versterk.
Daar is reeds ʼn totaal van 80 triljoen kubieke voet natuurlike gas in Rovuma gevind. Die ontdekking maak die land een van die nuwe hoofverskaffer van dié natuurlike hulpbron.
Mosambiek lê op die suidelike punt van ʼn skeur in die aardkors wat langs die Oos-Afrika kus tot by Somalië loop. Die land se ligging maak dit geologies gunstig vir die ontginning van natuurlike gas.
