Nuuskommentaar: Al weer volstruispolitiek met Zuma?

In bykans elke aspek van die ANC se agteruitboerdery met die pas-afgelope verkiesing speel pres. Jacob Zuma minstens ’n terloopse rol. Tog is Zuma nie ’n besprekingspunt tydens die vierdaagse bosberaad van die ANC waar lykskouing oor die verkiesing gehou gaan word nie. Is dit nie die toppunt van volstruispolitiek nie?

Die ANC hou ’n vierdaagse bosberaad om in wese die oorsake vir sy verliese tydens die afgelope munisipale verkiesings te ontleed. Maar, sê die sekretaris-generaal van die ANC byvoorbaat, pres. Jacob Zuma is nie ’n besprekingspunt nie.

Hoewel daar baie ander redes ook is oor hoekom die ANC soveel steun verloor het, soos dienslewering wat nie te waffers is nie, loop Zuma soos ’n groue draad, of eerder ’n rou rioolstroompie deur ’n ongeteerde straat, deur al die aspekte wat die ANC geknou het. Dink maar aan Guptagate, die spioenasiebande-saak, Nenegate en vele meer. En dan het Zuma ook heel selfstandig, en soos gebruiklik, genoeg goed kwytgeraak wat vir die land ’n ontsettende verleentheid was.

Hoe die ANC enige aspek van die verkiesingsverliese bespreek en ontleed gaan kry sonder om Zuma, wat self ’n wakende ogie hou, ook te bespreek, is nie duidelik nie. Dis soos om ’n kaas-en-hamtoebroodjie sonder kaas te probeer maak.

Kort na die verkiesing het verskeie ontleders die vermoede uitgespreek dat die Zuma-faksie die geleentheid gaan benut om hom op die ANC in Gauteng te wreek.

Die Gautengse ANC het maar kort voor die verkiesing “entoesiasties” oor Zuma geword en verskeie geleenthede gekry om skares toe te spreek. Tot taamlik onlangs was Zuma taamlik afhanklik van kerkgenootskappe in Gauteng wat die skeiding van kerk en staat nie verstaan nie en Zuma openlik ondersteun het.

En toe was Gauteng die provinsie waar die ANC sigbaar swak gevaar het, met die drie metro’s waar die ANC nie volstrekte meerderhede kon behaal nie, en die DA die Midvaal-munisipaliteit gemaklik behou het. Volgens ontleders gaan die Gautengse leierskap die sondebokke gemaak word. Dat die verliese was ten spyte van harde werk van die Gautengse leierskap, en dat Zuma vir ’n sterk verstedelikte gemeenskap ’n yslike blok aan die been is, kom nie daarop aan nie.

Dit mag wees dat die Gautengse leierskap die stang gaan vasbyt en weerstand bied daarteen om ter slagting gelei te word.

Nog ’n interessante aspek wat ter sprake kom, is dat verskeie opposisiepartye dit as voorwaarde vir koalisiegesprekke met die ANC stel dat die ANC eers vir Zuma moet pos. As die partye enduit hierby gaan hou is dit heel waarskynlik dat die ANC uiteindelik in nie een van die vier metrorade en ’n rits munisipaliteite met sogenaamde “hangrade” ’n koalisieregering kan vorm nie.

Daar is ook ’n paar partye wat nie openlik Zuma se kop op ’n stok eis nie, maar gewoon weier om met die ANC in ’n koalisie betrokke te raak.

Maar die politiek is nie altyd baie eerbaar nie, en “nooit” hou soms net ’n paar uur. Verrassings is dus nie uitgesluit nie.

Vir die huidige bly dit egter interessant dat die ANC so hard met Zuma as persona non grata gekonfronteer word, en desondanks volstruispolitiek speel.

Dit mag wees dat die ANC nou bloot oor die Zuma-kwessie probeer water trap om Zuma se opvolgstryd binne die beplande skedule te hou. As Zuma dan nog self in beheer is, verbeter dit die kanse vir ander kandidate soos dr. Nkosazana Dlamini-Zuma om haar vere reg te skud. Kry Zuma nou die trekpas en word adj.pres. Ramaphosa die waarnemende president, is die slag basies nou gelewer.

Die volgende jaar gaan egter ’n baie moeilike jaar vir enige president wees, met kwessies soos klasgeld vir studente, die druk waaronder die ekonomie verkeer en vele meer. Net dalk maak dit sin om ’n reeds gediskrediteerde ook met hierdie moeilikheid op te saal. Veral een wat grootliks, en feitlik eiehandig, vir die moleste verantwoordelik was.