Nuuskommentaar: ANC speel weereens slagoffer

Pres. Cyril Ramaphosa.

Die afgelope naweek het president Cyril Ramaphosa ʼn brief oor korrupsie aan alle ANC-lede gestuur. Hy noem dat die ANC beskuldigde nommer een is wanneer dit kom by korrupsie in die land.

In presies dieselfde asem verontskuldig hy egter ANC-korrupsie deur die blaam na die apartheid-regime te verskuif. Ramaphosa vermeld dat die huidige korrupsie dieper wortels het in die moreel en materieel korrupte apartheid-regime.

Volgens Ramaphosa het die ANC as bevrydingsorganisasie ten doel gehad om die korrupte regime omver te werp en met ʼn nuwe moreel eerbare bestel te vervang. Die ANC wou met regimeverandering nie net ʼn nuwe regering daarstel nie, maar ook ʼn nuwe meer etiese nasie.

Ramaphosa, wat die blaam op die skouers van apartheid plaas, is nie net veragtelik nie, maar ook ongelooflik hartseer. Die ANC erken hiermee dat hulle eintlik steeds uitgelewer is aan die bose erfenis van hul verlede. Ten spyte van die feit dat hulle die hoogste en mees verreikende mag in Suid-Afrika besit, is hul lot eintlik steeds afhanklik van hul voorgangers.

Die skadu van apartheid is sodoende nie net letterlik nie, maar ook moreel steeds verantwoordelik vir die ewige rampsaligheid van die ANC. Die slagofferstatus wat die ANC aan hulself toeken, weeg telkens swaarder as die gevolge van hulle eie optrede.

Dit is eintlik lagwekkend om te verstaan watter minderwaardigheidskompleks die ANC moet hê om 26 jaar later steeds soos uitgelewerde slagoffers op te tree. Hierdie minderwaardigheidskompleks is tweeledig. Aan die een kant is dit werklik en diepliggend. Aan die ander kant het dit oor die jare heen ʼn nuttige dekmantel geword waaronder hulle ons rot en kaal kan besteel.

Minister Nathi Mthethwa. (Foto: Kopano Tlape/GCIS)

Die eerste diepliggend en werklike minderwaardigheidskompleks is te bespeur in die optrede van ANC-lede soos die minister van sport, kuns en kultuur, Nathi Mthethwa. In Junie vanjaar het minister Mthethwa Krieket Suid-Afrika (KSA) oor die vingers getik oor die stand van hul transformasie. Volgens Mthethwa is KSA se topstrukture nie genoegsaam getransformeer nie. Mthethwa wou weet of wit aanstellings soos Jacques Faul, Graeme Smith en Mark Boucher nie ʼn stap in die verkeerde rigting is nie. Chris Nenzani, KSA-president, het hierdie aanstellings verdedig deur te noem dat hulle almal op grond van meriete gemaak is.

Volgens Mthethwa was hierdie stelling egter ʼn belediging. Ten spyte van wat Nenzani gesê het, het Mthethwa eerder gehoor: “Aangesien hierdie aanstellings op grond van meriete gemaak is – en dit geen swart mense insluit nie – is swart mense inherent onbevoeg.”

Mthethwa is in alle waarskynlikheid deeglik bewus van die feit dat hy ʼn pos vul waarvoor hy self skreiend onbevoeg is. Hy is ook ʼn groot voorstander van transformasie deur kwotas. Sodoende is Mthethwa ingekoop in die idee dat plekke vir swart mense gereserveer moet word. Hierdie beleid kweek maklik ʼn mentaliteit van minderwaardigheid.

Swart spelers wat wéét dat hulle hard gewerk het vir ʼn bepaalde posisie en oortuig is dat hulle dit verdien, sal waarskynlik nie aan die minderwaardigheidskompleks ly nie. Mense wat egter fundamenteel in hulself twyfel en weet dat hulle bo hulle vuurmaakplek besig is, reageer soos Mthethwa. Vir hulle is kwotas relevant, juis omdat hul eie vermoëns hulle waarskynlik nie in dieselfde posisie sou kry nie. Sodoende benodig jy ʼn stelsel wat ten gunste van jou diskrimineer. Jy is uitgelewer aan omstandighede en nalatenskappe buite jou beheer – daarom is jy self nie volledig verantwoordelik vir en verantwoordbaar teenoor jou eie optrede nie.

Dit is hierdie selfde mentaliteit wat dit regverdigbaar maak om apartheid se korrupsie vir jou eie korrupsie te blameer. Die geïnstitusionaliseerde nalatenskap daarvan weeg swaarder as jou individuele optrede.

Die tweede deel van die minderwaardigheidskompleks is ʼn meer oppervlakkige en bruikbare een. Diegene wat hulself op hierdie slagoffer status beroep, voel nie noodwendig soos slagoffers nie, maar is deeglik bewus daarvan dat hulle dit tot hul eie voordeel kan aanwend.

Argieffoto

Die ANC is oor die afgelope 26 jaar telkens toegelaat om omstandighede buite hulle beheer – soos apartheid – te gebruik as verskoning vir hul eie tekortkominge. Weens die toksiese aard van die rasdebat is hulle keer op keer toegelaat om dit as verskoning te opper. Enigeen wat hierdie argument van die ANC afskiet, is uitgekryt as ʼn rassis wat apartheid goedpraat. Die ANC het die morele afkeurenswaardigheid van die apartheid-regime sodoende in ʼn nuttige wapen omvorm.

Dit is met hierdie morele wapen wat die ANC die waansinnige vlakke van korrupsie wat hulle gepleeg het en steeds pleeg, regverdig. Selfs in die brief waarin president Ramaphosa die ANC se korrupte kultuur uitwys, noem hy dat die ANC se korrupsie eintlik weens apartheid ontstaan het.

Dit is regtig uiters sinies van Ramaphosa om nou nog so blatant die ANC as die slagoffer te skets. Minder as twee weke gelede is Zandile Gumede – wat tans strafregtelik vervolg word vir korrupsie – herontplooi. Vroeër vanjaar is twee ANC-partylede wat weens skuld in die VBS-skandaal geskors is, weereens in hulle poste aangestel.

Die ANC is letterlik besig om met een hand op die Bybel hul sondes te bely terwyl hulle met die ander hand die belastingbetalers se spaarvarkie steeds slag.

Die ANC het deur die loop van hul heerskappy soos ʼn slang in die gras weggekruip. Terwyl hulle in volle slinksheid ons besteel, het hulle geskuil onder die morele dekmantel van die onregte van apartheid. Hoewel hulle herhaaldelik sê dat hulle korrupsie teenstaan en veroordeel, gaan hulle nooit werklik tot daad oor nie. Die ANC gaan waarskynlik aanhou steel, totdat daar niks oor is om te steel nie.

Dit is daarom ons verantwoordelikheid om nie aandadig te wees aan hul korrupsie nie. Diegene in die private sektor moet self hul kant skoonhou. As burger moet jy self besluit tot watter mate jy moreel en wetlik bereid is om hul inkomstestroom van belasting te beperk. Anders as die ANC moet jy dan egter ook bereid wees om met die gevolge van jou dade te leef.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

45 Kommentare

jongste oudste gewildste
Mariana

Ag nee regtig, altyd apartheid se skuld. Blameer als op die apartheidsregering en die blankes. Altyd gedink hy is dalk bietjie anders, maar helaas is hy ook nes die res, aanvaar geen blaam, dit moet iemand anders se skuld wees. En dan is hy president…….of is hy. SA in regtig in groot moeilikheid en die ANC is te blameer vir dit. Maar dit is juis wat hulle wil hê, is dit nie. Wonder wie gaan die beste korruptes wees as als uiteindelik platval, wie se bankbalans gaan die sterkste wees. Dit gaan beslis nie “our people”wees nie. Nee hulle gaan… Lees meer »

katerinadiekat

Pateties. Oor n duisend jaar sal apartheid nog steeds die skuld kry vir alles wat verkeerd loop onder die ANC regime. Mens kan niks minder verwag van hulle nie. Ek is nie seker dat hulle Regtig glo dat Apartheid te blameer is nie. Dis net n handige verskoning. En dit sal misbruik word vir altyd. Om verantwoordelikheid te neem is n kenmerk can volwassenheid en integriteit Not one member of the ANC government is a child or a teenager. So that leaves us with a lack of integrity. Volwassenheid kan bereik word, inbors en goeie karakter, ongelukkig nie. You either… Lees meer »

Werner

Tipies komunisme blameer altyd iemand anders

JohanR

Met die lot is ek klaar klaar klaar…..#VoerstsakANC!

Jaco

Geagte ANC: DEPORTEER ASSEBLIEF die gehate rassistiese korrupte wit mense na Europa, Amerika, Kanada en Australië. Dis ok. Ons gee nie om nie. As verdere straf vir apartheid is ons selfs bereid om met NIKS van vooraf in daardie lande te begin.
Net vreemd dat, as ons dan so sleg is dat julle ons lamk reeds met regstellende aksie en BEE uitskuif (duidelik is ons belastinggeld nie nodig nie), dat julle ons nog nie gedeporteer of i ‘n wit tuisland ge-“dump” het nie.