Nuuskommentaar: Die wit messias-kompleks van linkse elite

Die polisie verjaag betogers naby die Hoërskool Brackenfell met ‘n waterkanon. (Foto: Rob Hutchinson/Twitter)

Die afgelope Vrydag was ʼn heel gebeurtenisvolle dag vir die EFF. Die “rewolusie” was redelik kortstondig met die sogenaamde grondmagte wat vinnig uitmekaargedryf is met ʼn bietjie water, verf en traanrook.

Die een ding wat byna groter opslae gemaak het, was die kommentaar van die Universiteit van Kaapstad (UK) se EFF-studenteleier, Jack Markowitz – kleinseun van Leon Markowitz, voormalige DA-LUR en fondsinsamelaar in die Wes-Kaap. Markowitz is gebore en getoë in Kaapstad en studeer politiek en filosofie aan die universiteit.

Hy het groot opslae in die media gemaak met sy opmerkings waarin hy Brackenfell spesifiek en wit mense sonder enige bewyse beswadder:

“The racism is instilled in the bones of people in Brackenfell, as it is across South Africa, but it’s more open here. […] Things have gotten worse in the last 30 years. […] We are here to start a conversation about land and generational wealth. I’ve been an EFF member since I was 18. I fully agree with their message. […] We, as white people, are holding onto our parents’ money. There was no healing in 1994. There needs to be mass reparations.”

Markowitz se menings strook met die EFF s’n, afkomstig van die rasse-Marxisme wat die afgelope dekades baie prominent onder veral linkse elite is.

Marxiste verstaan die wêreld as ʼn inherent onderdrukkende stelsel waarin daar ʼn klas van onderdrukkers en onderdruktes is – die groep waarin jy gebore word, is jou ewige lot. Die stelsel moet daarom volledig in ʼn rewolusie omvergewerp word ten einde ʼn nuwe stelsel van gelykheid te vorm.

Die linkse elite se denke lê net klem op ras, eerder as klas. Hierdie idees dwing ʼn mens in ʼn oorvereenvoudigde bose wit teenoor onskuldige swart wêreld in. Jy is ʼn rassis wanneer jy die stelsel waarvan onderdrukking inherent deel is, onderhou. Dit lei daartoe dat jy jouself daaraan moet verbind om die stelsel omver te werp ten einde van die onderdrukking ontslae te raak. Elke wit mens moet die stelsel probeer omverwerp, anders is hulle rassisties.

Markowitz beskou homself as een van die genadige wit mense wat die uitgelewerde swart mense moet help om uit onderdrukking te ontsnap deur die stelsel omver te werp. Tog beskou hy homself nie as deel van die stelsel wat omvergewerp moet word nie.

Jack Markowitz, ‘n studenteleier van die EFF. (Skermgreep: Twitter)

Hy is self in ʼn posisie om sy welvaart, posisie by ʼn universiteit en mag prys te gee – tog het hy nie. Hy wil eerder net aan ander mense voorskryf om dit te doen. Dit is ook die absolute toonbeeld van die sogenaamde sjampanje-sosialiste: Hulle is baie lief daarvoor om ander mense se welvaart weg te gee, maar nie sommer hul eie nie.

Markowitz is sodoende die absolute toonbeeld van die wit liberale messias-kompleks waarteen Steve Biko reeds voor die val van apartheid gewaarsku het. Volgens Biko het die wit liberales se aanbod om swart mense te help altyd ʼn neerhalende ondertoon gehad; nie omdat hulle die onderdrukkende stelsel van apartheid wou onderhou nie, maar omdat hulle eintlik geglo het dat swart mense nie die vermoë het om apartheid alleen omver te werp nie. Biko meen dat die wit liberales se strategieë om swart rassisme te beëindig dikwels hul eie posisie as beskermhere van moraliteit in die samelewing bewaar.

Vanuit hul eie wysheid en verligting mag die liberales ander mense voorskryf wanneer hulle rassisties is, hoe hulle rassisties is en hoe hulle dié probleem moet oplos. Dié liberales is eintlik ook skuldig aan hierdie rassisme – hulle is immers ook wit, ryk en magtig. Hulle los hierdie probleem op met die verskynsel van “die eie-liefde van selfhaat”.

Hulle erken en bely dat hulle weens hulle witheid boos en rassisties is. Juis omdat hulle braaf genoeg is om dit te erken, is hulle wonderlike en effe meerderwaardige mense. Alle ander mense wat nie in massas hulle “skuld” wil erken nie, is agterlik en rassisties. Juis omdat die linkse elite sulke wonderlike mense is, mag hulle almal dan voorskryf wat reg en wat verkeerd is. Hulle mag ook ander voorskryf om hulle welvaart en mag aan swart mense oor te gee – juis omdat daardie mense nog rassisties is.

Hierdie voorskrifte sonder dat hulle ooit self hulle mag en welvaart prys hoef te gee.

Hierdie linkses bevestig sodoende dat swart mense nét met die hulp en barmhartigheid van die wit man sal kan slaag. Indien wit mense nie in massas erken dat hulle weens hulle witheid rassisties is nie, sal swart mense vir ewig onderdruk bly.

Daarom moet wit mense hulle generasiewelvaart, eiendom en mag vir swart mense gee – dit is immers die enigste manier waarop hulle dit ooit sal kan bekom. Dit is natuurlik net sagter rassisme. Swart mense is óók volwassenes met presies dieselfde regte en verantwoordelikhede as alle ander mense. Die gedagte dat hulle die hulp en leiding van linkse elite nodig het om sukses te behaal is bloot rassisties.

Wit linkse elite beskou almal andersins as minderwaardig en/of rassisties – swart mense is onbeholpe en wit mense wat anders as hulle dink, is agterlik en rassisties. Hulle is die enigste groepie wat werklik die lig gesien het en reg dink en optree. Die ironie van die saak is dat hulle denke seker een van die krasste vorme van rassisme is.

Mense word in hulle wêreld gereduseer tot die kleur van hulle vel. Dit laat geen ruimte vir mense se individuele optrede, persoonlike keuses, familiegeskiedenis, waardes en kultuur nie. Dit skets ʼn wêreld waarin alles wat werklik deurslaggewend is, bloot geïgnoreer word. Dit is belangrik om nié deur hierdie linkse elite dikteer te word nie. Hulle probeer ons oortuig dat óns áltyd die rassiste is wanneer ons omgee oor dinge soos kultuur, waardes en persoonlike verantwoordelikheid. Die feit is egter dat hulle sagte rassisme teenoor swart mense veel erger kan wees. Die linkse elite kan gerus uit Biko se eie verdoemende woorde leer:

“I am against the superior-inferior white-black stratification that makes the white a perpetual teacher and the black a perpetual pupil (and a poor one at that).”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

36 Kommentare

jongste oudste gewildste
JohanR

Toe die bomme begin val en die kanone begin skiet, het die wit ou sy rooi baaitjie uitgetrek, en rondgedwaal in net sy wit hemp. Sy broek was ook seker bevuil! Wonder of die wit ou ‘n maand op ‘n werkende bees, melk of graan plaas sal kan uithou. Die handjies is seker sag en spierwit!

Jacques

“You cannot start a revolution if you cannot even start a lawnmower.”

Dup

Die “leiers” van die rooipette bly in luukse huise,dra ontwerperklere/horlosies en ry in peperduur motors……terwyl hulle ondersteuners in plakkerskampe bly,baie is werkloos en hulle enigste vervoer is minibus taxies.Hoe dom kan n mens wees?

Hein

Ek hoop regtig Pappie het dadelik sy studie beurs gestop en dit vir een van sy EFF boeties gegee. Dan kan hy maar sy PappaLemma gaan vra om te betaal. Dommer as grond.

Misky

Hy kan sy sterre dank ek is nie sy ma nie…… boetie, jy sou bitter spyt wees en van mening verander het