Nuuskommentaar: Gaan Ramaphosa chaos kan keer?

Beotgings in Hermanus (Maart 2018) Foto: Visualise Memories Production Company/Facebook via ANA

Op die gevaar af dat ’n weifelende pres. Cyril Ramaphosa se kleitrappery oor konflik tot rollende massa-aksie oor grondgryping kan lei, moet hy boonop graderingsagentskappe paai en ’n algemene klimaat vir ekonomiese groei skep. Intussen lyk dit nie of oudpres. Jacob Zuma dit goed opneem dat die ANC se NUK nie die party se formele steun aan hom vir sy hofsaak wou toesê nie, en dit lyk of hy soos ’n wafferse don Zuma duister magte aan die organiseer is om dinge vir Ramaphosa moeilik te maak.

Die een ontstellende berig ná die ander stroom in oor onluste op Hermanus. Die polisiestasie in die swart woongebied is aan die brand gesteek, skole is vroeg gesluit en open eers weer ná die skoolvakansie, die polisie het sakelui aangeraai om hul ondernemings te verlaat. ’n Mosambieker byt die spit af – dit kos immers nie veel om ook xenofobie by onmin in te sleep nie. Polisielede word ook aangeval en die bloed vloei. Tot dusver is blykbaar nog net munisipale grond beset en probeer om blyplek in te rig.

Deur die loop van die dag word ’n naam landwyd al bekender – Zwelihle. Hierdie swart woongebied bars uit sy nate en die naasliggende vliegveld, Hermanus se enigste, moes gesluit word oor die baie drentelaars wat op die aanloopbaan beland het.

Die instroming uit die Oos-Kaap is deel van ’n werklikheid wat ook naasliggende dorpe soos Elgin en Grabouw kort-kort onder druk plaas. ’n Paar maande gelede het die naasliggende Kleinmond, wat ook onder die Overstrand-munisipaliteit val, ook erg onder skrikwekkende betogings deurgeloop. Die ANC word woedend as na hulle as ekonomiese vlugtelinge verwys word, maar feit bly dat hulle ’n ander kultuurgebied indring waar daar dus nie sommer skole sal wees wat aan hul taalvoorkeure kan voldoen nie.

Hulle volg in die spore van vorige geslagte wat reeds reuse- swart stede op die Kaapse Vlakte gevestig het, en waar sake ook nie aldag klopdisselboom verloop nie. Tussenin is plakkergebiede soos by Houtbaai wat druk verder verhoog, en boonop gereeld onder erge brande deurloop.

Dit plaas enorme druk op die stad Kaapstad en ander munisipaliteite se begrotings en infrastruktuur, en die geweldige bevolkingsontploffing het ’n gesonde aandeel in die Wes-Kaap se huidige waterprobleme.

Hierdie keer was die vonk in die kruitvat die onbesonne besluit van die ANC om die Grondwet so te wysig dat daar beslag gelê kan word op eiendom sonder vergoeding. Hoewel die planne deel van ’n grondhervormingsplan uitmaak en dus sterk op die grondkwessie afgestem is, kan haas enige eiendom geraak word as die wysiging aan die Grondwet goedgekeur word.

Hoewel mnr. Ramaphosa, toe nog adjunkpresident, wal probeer gooi het om ’n kleed van verantwoordbaarheid oor die kwessie te trek, was sy skynbare entoesiasme ook net te sterk om behoorlik brieke te kan aandraai.

Boonop het Ramaphosa ’n baie ingewikkelde “toertjie” uitgeoefen om die nuwe ANC-president te word, en in die proses skynbaar perde opgesaal wat eintlik in die Zuma-kraal gestaan het – mense soos Mpumalanga se premier, David Mabuza, en die Vrystaatse premier, Ace Magashule. Nou moet hy hierdie wilde perde probeer ry, terwyl oudpres. Jacob Zuma skynbaar sy magte soos ’n Mafiabaas op gereedheidsgrondslag kry deur Ramaphosa onder enorme druk te plaas, terwyl sy eie ondersteuners hom bankvas steun.

Zuma het hierdie opening gekry deurdat die ANC se Grondwet aan oudpresidente ’n sittingsreg op die NUK gee, iets wat Zuma nou opgeneem het en na berig word soos ’n Mafiabaas oorheers het. Hy kon wel nie die ANC se formele steun vir die komende hofsaak gemonster kry soos hy gehoop het nie en is daaroor deur die NUK met die kluitjie in die wind weggestuur. Maar nou monster hy sy skaduagtige ondersteuners uit veral KwaZulu-Natal.

Don Zuma is terug, met skerp tande, terwyl Ramaphosa die twyfelagtige en kwesbare strukture wat hy so meesterlik gemonster het om leier te word, onder al groter druk staande moet hou.

Besetters het op 10 Maart 2018 plakkershutte onwettig op grond in East Lynne in Pretoria opgerig en oproerig geraak nadat die strukture verwyder is. Foto: Verskaf

Intussen speel ’n ander verhaal hom af wat die vind van haalbare en regverdigbare oplossings vir die grondkwessie bedreig. Die TLU-SA het pas bekend gemaak dat hulle hul onttrek aan ’n spitsberaad oor die kwessie, nadat hulle op die nippertjie daarvan gehoor, en toe genooi is.

Die beraad word deur die Nasionale Forum vir Dialoog aangebied, ’n organisasie waarmee oudmin. Roelf Meyer verbind word. (Meyer is aangewys om die landbougemeenskap te verteenwoordig.) Ook AfriSake, wat tot dusver ’n leidende rol gespeel het om rolspelers in dialoog te kry, is uit die verrigtinge gesnoep.

Wat TLU-SA nou baie ongelukkig stem, is die beraad se vertrekpunt wat onder meer ʼn algemene stelling dat grond deur kolonialisme of apartheid van swart mense gesteel is. “TLU-SA bepleit al lank ’n konferensie oor die geskiedenis van grondbesit, waar alle stawende bewyse oor grondbesit op die tafel geplaas word. Die versoek val op dowe ore, want die regering is skynbaar te bang om die feite te hoor, wat waarskynlik gaan insluit dat die swartes dan net so min reg op die grond het,” sê mnr. Louis Meintjies, president van TLU-SA.

“Die nuutgeskepte leuen dat landbouers grond gesteel het, moet nou tot die been oopgevlek word, sodat die geskiedenis vir eens en vir altyd geboekstaaf kan word en die toekoms sonder enige onsekerheid oor hierdie aangeleentheid aangedurf kan word. Met verlede week se verslag van Moody’s is dit pertinent uitgewys dat daar beleidsekerheid in die land moet kom. Landbou vra reeds lank daarvoor, maar die beleidsonsekerheid oor landbou en grondbesit word eerder net al groter, veral omdat niemand meer met sekerheid kan sê of die owerheid nog verbind is tot privaat besitreg en die vryemarkstelsel nie. Dit wil eerder lyk of die ANC besig is om geleidelik na sosialisme en kommunisme te beweeg.” (Lees asseblief volledige berig hier.)

Hoeveel berade, oor die landbou en andersins, het al op niks uitgeloop nie omdat die organiseerders uitgaan van die standpunt, wat die ad hoc-komitee oor eiendomsreg die Groot Leuen noem nie.

Veel beter leiding van Ramaphosa en sy raadgewers word nou verwag, maar gaan sy bruikleen van andermansgoed hom daardie geleentheid bied?

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Johannes van Rooyen

NEE want hy is deel daarvan die ANC EN EFF is lankal besig met die planne

Michael

Nee wat hy gaan niks daar aan doen nie hy het dit dan begin .Weet hy ooit wat regtig aan die gang is?

Johan

Nee….nie as hy nie Malema aan sy bek ruk nie..

marous

Nee , want hy is die aanvoerder daarvan .

Happy

HOEKOM sal hy dit wil keer? HY MOET GEWILD bly onder die MASSAS om aan bewind te bly volgende jaar en om steeds die President te wees. Hy het naelskraaps gewen teen Dlamini Zuma so hy moet nou die GEWILDE ding doen en wittes verjaag en grondvergrype toelaat en grense oopmaak sodat almal die land kan binnestroom en misdaad pleeg en huise en plase vat .. dit is FREE FOR ALL hier in SA nou .. HAPPY HOUR!