Nuuskommentaar: Is Malema ʼn politieke fabrieksfout?

Julius Malema. Foto: ANA

Al hoe meer uitlatings, meestal rasbenepe, van die EFF-leier, Julius Malema, laat hom klink na die produk van ʼn politieke fabrieksfout. Hy durf egter nie onderskat word nie, want dit besorg aan hom onverdiende bates en politieke vlerke.

Met die totstandkoming van die EFF is gestalte gegee aan omtrent alles wat lelik is in Suid-Afrika, en die Vryheidsfront Plus was ongetwyfeld reg om beswaar by die Onafhanklike Verkiesingskommissie aan te teken teen die registrasie van die party. Die stigters het onder meer verklaar hulle sou minder in versoening en meer op “geregtigheid” konsentreer.

In Suid-Afrika is albei terme gelaai met uiteenlopende betekenisse, en ’n voorafberaad sou waarskynlik meer werd gewees het as ’n feitlik onbeperkte registrasie. Selfs die Grondwet word gereeld geminag. Afgesien van grondbesettingsaksies (waarna die wettige eienaars hulle gereeld teen polisietraagheid vasloop en AfriForum en ander die howe moet nader) weier EFF-raadslede om te staan as die Afrikaanse deel van die volkslied gesing word.

Hitler se opkoms is ook in vele kringe onderskat. Dit is, soos sommige Westerse lande aanvanklik, selfs verwelkom. Later het hulle help bomme reën op Duitsland. Malema is verhoorafwagtend op ’n rits aanklagte waarvan sommige skynbaar mettertyd net onafgehandel sal verdwyn.

Die meeste aanklagte nou handel oor aanhitsing om ’n misdryf te pleeg, soos haatspraak en aanhitsing tot onwettige grondbesetting. Daarom is sy beroep op die konstitusionele hof om ’n gedeelte van ’n ou wet ongrondwetlik te laat verklaar, erg pikant.

Intussen Iyk dit of die man se bravade om om te krap net erger raak. Die Grondwet, en selfs die Handves van Menseregte wat eerder handel oor die kodefisering van onvervreembare geboortereg as tegniese ordereling, word blatant uitgedaag.

Let wel, met ’n minagting selfs vir die internasionale reg en buitelandse mening. Negatiewe gevolge uit die buiteland pla ook nie. In die praktyk sal nie met parlementslede se salarisse en byvoordele gelol word nie – die belastingbetalers is mos daar om gemelk te word – en in ’n politieke sin is die wit mense daar om die blaam te kry?

Onthou wie het voor die Tweede Wêreldoorlog die blaam gekry?

Laat ons nie oor die afloop bespiegel nie.

Dit het die politiek korrekte ontleders nie lank geneem om allerlei kombersies oor die werklikheid te draai nie. Maar Malema en sy “agbare” woordvoerder laat hulle nie sommer vanuit die verkeerde kringe (wat nie swart is nie) heuning om die mond smeer nie. Kort-kort moet ’n lap of iets gebruik word om eier uit die gesig te vee.

Om te reken Malema is buite beheer, is om die man gruwelik te onderskat. Om ’n aanhanger van Mugabe en wyle Hugo Chavez van Venezuela as ridder te beskou, nogal as iemand wat baie gemaklik met ’n volwasse demokrasie is, en veral grondwetlike demokrasie, is pikant.

En noudat Jacob (wie nou weer) polities bykans ondergeploeg is, is die vryery tussen die ANC en die EFF uit die broeikas, en elke DA-alliansie se stille gedoog van die EFF in die gedrang.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

44 Kommentare

jongste oudste gewildste
Hettie

Julius kan net gedy met aandag , dit is ons eie skuld dat hy dit regkry om die blankes so te ontstook !
Hy geniet die reaksie wat hy kry !gooi hom ‘n dowe oor!

Gertryda

Uiters gevaarlike kalant
Ek sal met graagte immigreer maar dan moet hy vir my die geld gee
Ek het nog nooit iemand teegekom wat so n haat in hom het nie
Ek is bitter bang vir die rooi gevaar

Asielsoeker

Malema is ons sleutel to t uitkoms uit hierdie kontinent. Sy dreigemente regverdig asiel vir ons sodat ons almal, ryk en arm, uit die land kan kom terwyl ons nog kan.

Plan B

Die EFF se opkoms beteken ons sal of moet onderhandel vir selfbeskikking of ons sal met oorsese lande reel om vir ons toevlug te gee, ek kan nie sien dat ons die komende vlaag van haatspraak teen ons sal oorleef nie en daar is nie meer hoop vir n reenboognasie nie. Dis nou vluug of selfbestuur, dis al hoop wat ons het.

Linda Gouws

Hoekom kry hy so baie mediadekking?