Nuuskommentaar: Lugrampe weer in kollig

Soldate van Algerië help om die toneel op te ruim waar ʼn vliegtuig in die Blida-provinsie in Algerië neergestort en die lewens van 257 mense geëis het (11 April 2018). Foto: Xinhua/ANA

Die Algerynse lugramp plaas opnuut die fokus op lugvaartveiligheid. Nogtans bly dit een van die veiligste reismetodes as statistieke die hoofnorm is.

Volgens vele bronne is dit veiliger om ʼn reis per vliegtuig te onderneem as om met ’n motor van die lughawe huis toe te ry. Aannames hieroor kan baie wissel.

Die uwe en sy gesin het die week per vliegtuig van Bloemfontein na Kaapstad gereis, en reis eerskomende Dinsdag weer Bloemfontein toe. Min of meer dieselfde tyd as wat die vliegtuig Kaapstad toe in die lug was, het ’n Algerynse militêre vliegtuig met ’n lewensverlies van 257 neergestort. Dit is by benadering nie die grootste lugramp ooit nie, en sal nou die 16de plek deel met die Berg Erebusramp in Antartika op 23 November 1970.

Die grootste lugramp ooit was in Tenarife op die Kanariese Eilande in 1977 toe 583 mense dood is nadat twee Jumbo 747’s op die aanloopbaan gebots het.

Suid-Afrika se grootste lugramp was die Helderberg wat in 1987 naby Mauritius in die see gestort en die lewe van al 159 mense aan boord geëis het.

Soldate van Algerië help om die toneel op te ruim waar ʼn vliegtuig in die Blida-provinsie in Algerië neergestort en die lewens van 257 mense geëis het (11 April 2018). Foto: Xinhua/ANA

Onder die 25 grootste lugrampe ooit, tel die Lockerbie-ramp, en verskeie waar ook mense wat op die grond was, dood is nadat hulle deur wrakstukke getref is. Twee vliegtuie het in die lug gebots, en ’n paar gevalle het kortstondig plaasgevind waar ’n vlieënier selfmoord gepleeg het, en die vliegtuig met almal aan boord saamgeneem het, of wou saamneem.

Twee Maleisiese vliegrampe word nog weens eiesoortige omstandighede ondersoek. In een geval is die vliegtuig oor die Oekraïne neergeskiet, skynbaar deur Russiese soldate, en die ander misterie geld waar ’n vliegtuig oor die Atlantiese Oseaan neergestort het – skynbaar ook as deel van die vlieënier se selfmoord.

In Suid-Afrika bestaan daar nou groot kommer oor die toekoms van die lugdiens, enersyds weens ’n gebrek aan bestuurservaring en andersyds die gevolge van swak onderhoud. Trouens, die SAL is tans ’n voorbeeld dat strategiese bates deur die beste bestuur gelei word. Andersins is dit ’n uitstekende voorbeeld van waar sosialisme net kan werk solank iemand anders se geld nog nie opgeraak het nie.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

4 Kommentare

Jerry ·

Die personeel getalle verhouding wat benodig word per vliegtuig is +-125 tot +- 175. Die SAL ontplooi naby aan 900 personeellede per vliegtuig. Dit is net nog n voorbeeld van onbevoegde kaderontplooiing en onbekostigbare werkskepping wat dit ten doel het om belastingbetalers se sakke leeg te plunder.

marous ·

As taxis die dag begin vlieg sal osmose ook te gevaarlik wees om van plek te verwissel ….

Privatiseer tog net ·

SAL moet net eenvoudig geprivatiseer word. Dit het nie meer n ontwikkelingsdoel nie want die privaatsektor vervul dieselfde diens, teen baie beter pryse.

Marthinus Willemse ·

Om te sê vlug MH17 is “skynbaar deur Russiese soldate” oor die Oekraïne afgeskiet, is fopnuus, aangesien dit nog nie bewys is nie. Professor Karl van Wolveren van Amsterdam is baie ongelukkig, omdat Nederland, die Oekraïne, Australië en Maleisië `n geheime akkoord onderteken het, wat bepaal dat, indien Rusland nie die skuldige is nie, die werklike skuldige nooit ooit bekend hoef te gemaak word nie.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.