Nuuskommentaar: Mag die Springbok vlieg of nie?

Een van die prente wat verlede jaar na die Springbokke se nederlaag teen Japan op Twitter gedeel is.

Een van die prente wat verlede jaar na die Springbokke se nederlaag teen Japan op Twitter gedeel is.

Die ANC het hom gou gedistansieer van een van sy LP’s se aandrang in ’n parlementêre portefeuljekomitee dat die Springbok-embleem moet waai, maar dit is onrusbarend dat sulke sentimente steeds opduik, terwyl transformasiedoelwitte in ’n rasgedrewe kwotastelsel ontwikkel. Intussen is bevind Suid-Afrika is die derde gevaarlikste land ter wêreld, en nog plaasmoorde het die land geskud. Moet daar nie oor die voorkeurlys herbesin word nie?

Talle mediaberigte dat die ANC opnuut teen die Springbok-embleem losgetrek het, het talle rugbyliefhebbers ontstel. Later het die ANC, by monde van sy woordvoerder, Zizi Kodwa, egter gesê die LP wat in die portefeuljekomitee oor sport die aanval op die Springbok-embleem van stapel gestuur het, Strike Ralegoma, het nie die ANC se amptelike standpunt gestel nie. Die ANC het hom dus ook van Ralegoma se stellings gedistansieer.

Dit laat natuurlik die vraag oor hoeveel keer die Springbok nog onder skoot gaan kom, hetsy amptelik of persoonlik.

Die eintlike vraag handel oor die vraag oor tot watter mate regeringsinmenging in sport aanvaarbaar kan wees. Die meeste sportkodes, soos Fifa en die Internasionale Olimpiese Komitee, verbied regeringsinmenging. Verskeie lande is ook al uit Fifa geskop weens regeringsinmenging in sokker, waaronder Griekeland, Kenia en Iran, en is eers hertoegelaat nadat die regerings onderneem het om hul neuse uit sokkersake te hou. Selfs Brasilië en Nigerië moes mooi broodjies bak om nie geskors te word nie.

Die ANC het egter ’n probleem en streef ’n vorm van absolutisme na waar feitlik alle lewensfere as ’n soort “onderdeel” van die staat beskou word. Sport is een, en ook die kerke word gereeld daarmee “belas” om die land se moraliteitsprobleem in orde te kry.

Ralegoma het egter ook die Springbok-embleem as teken van ’n gebrek aan transformasie beskou. En hierdeur is die probleem verdiep. Dit is baie moeilik om nou ’n ander beskouing te hê as dat transformasie, in die hande van die ANC, niks anders as ’n rasgedrewe kwotameganisme is nie. Hoewel, in hierdie geval is Saru ook voor stok gekry oor die wesenlike afwesigheid van vroue in die topbestuur.

Maar normaalweg is transformasie alles oor kleur, en hieroor het die ANC-lede in die portefeuljekomitee hul monde goed uitgespoel. Dit ten spyte daarvan dat feitlik alle sportkodes, rugby ingesluit, alle vorme van rassisme verbied.

Soos sake in die land staan, is dit eintlik skreiend dat soveel gewag gemaak word oor sporttransformasie en -embleme (veral in ag genome dat die regering nie naastenby genoeg doen om uiters noodsaaklike sportgeriewe by agtergeblewe skole te skep nie).

Volgens ’n verslag van Numbeo wat pas uitgereik is, is Suid-Afrika die derde gevaarlikste land ter wêreld. Van die groot stede tel ook onder die gevaarlikstes ter wêreld. Tydens ’n plaasaanval in KwaZulu-Natal waartydens twee mans doodgeskiet en ’n derde gewond is, was daar nie minder nie as 12 plaasaanvallers (lees meer hier).

Die landwye droogte begin aan elke landsburger se sak pluk, terwyl baie boere wat dit wel finansieel gaan oorleef, dekades gaan neem om te herstel.

Wat is nou die belangrikste vir die land? Om die Springbok te slag of om van pres. Jacob Zuma ontslae te raak?

’n Bietjie meer geesdrif oor waar dit saak maak, sal vertroue skep. Om segmente van die bevolking deur kulturele imperialisme te vervreem kan mos geen voordeel vir die land inhou nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

19 Kommentare

jongste oudste gewildste
StopTheMadness

Dalk moet n paar van die groter nie-manlike ANC LP`s n paar keer in die voorry sak om te verstaan waaroor rugby regtig gaan! Kulubuse Zuma sal n lekker vaskop maak! Die Gupta broers op senter….hulle is so glibberig niemand sal hulle kan tackle nie! Ons maak dan vir Nommer Een `n nommer nege want hy pass die heeltyd die ball vir iemand anders! Nooit sy skuld nie….en dan vir Mantashe op heelagter van hy moet al die balle uit die lug uit vang en iets daarmee prober doen…. Die hele ding is n grap man! Dat grootmense hulleself ophou… Lees meer »

HEVW

Dit is maar die werksmetode van kommunisme. Die volk moet van al sy kultuurhistoriese besit wat boustene van die trots van n volk is beroof word. Dit pas die nuwe wereldorde dat n volk in n willose, edentiteitlose, manipileerbare massa verander word.

Humor

Die regering moet op n meer agressiewe wyse gedwing word om aan die mees noodsaaklike aandag te skenk. Die oppsisiepartye sowel as al die burgerlike instellings moet hiervoor verantwoordelikheid neem. Om die skrywe van die FAK aangaande musiek en sang aan te haal;”Dit is een septiese tank en die dr…… dryf bo.”

Ekke

Ek verstaan nie eintlik hoekom daar so uitgevaar word oor die embleem nie? Dit is tog nie iets met enige menseras te doen nie. Dalk moet iemand dit verduidelik. Dai arme bokkie het ‘n paar kleure en verteenwoordig dalk ook die sogenaamde reenboognasie waarvan so baie gepraat word. Dit is ook ‘n klug want daar is geen plek vir meer as een ras in SA nie. Die regering wil dit ‘n een en enigste ras he.

m

Ag liewe hel, hierdie sotte soek altyd iets om oor te kerm. Los tog die bokkie uit hy het tot nou toe niemand gepla nie behalwe die rassiste in hierdie land wat nie eers rugby kyk nie.