Nuuskommentaar: Magashule ‘se boek’ – morele kompas of aanslag teen Ramaphosa?

Ace Magashule. Foto: ANC/Facebook

Die idilliese veldtog van verskeie mense om kiesers op te roep om in die komende verkiesing vir pres. Cyril Ramaphosa te stem, lyk al meer na ’n misoes. Pleks van agterdeurstemme vir die ANC trek, kan dit boonop dalk nou eerder vir dié party ’n vol skoot bokhael in die agterstewe gee.

’n Belangrike sneller hiervoor is ʼn nuwe boek, Gangster State: Unraveling Ace Magashule’s Web of Capture, en selfs nog meer die ANC se amateuragtige poging om die trefslag van die onthullings oor sy sekretaris-generaal, Ace Magashule, te probeer fnuik. Seker die vernaamste fout wat die ANC in sy reaksie maak, is om die tydsberekening van die onthullings so na aan die verkiesing as vuilspel af te maak, en daarom onwaar.

Toe nie só nie. Heelwat van die onthullings is al tevore gedoen. Een is dat oudpremier Marshof van die Vrystaat volgens die boek onthul het dat Magashule op die punt was om deur die destydse Skerpioene in hegtenis geneem te word. Dit was egter destyds onder meer goed onder die LPW’s van al die partye bekend, en daar het niks van gekom nie ná Jacob Zuma president geword en die Skerpioene “betyds” ontbind het. Maroela Media het ook onder meer op 12 September 2018 daaroor berig. Dit sê nie veel van die ANC se grondvlak-inligting dat dit nou eers basies dieselfde nuus as “nuut” aanbied nie.

Heel pikant het die ANC se eie minister van Intelligensiedienste ook pas beweer dat Magashule met die kandidaatlys van die party gepeuter het.

Die ANC se waarnemende woordvoerder, Dakota Legoete, leef in ’n droomwêreld deur die skrywer van die boek Gangster State, Pieter-Louis Myburgh, van ’n slenter te beskuldig wat ten doel het om die ANC in ’n slegte lig te stel. In watter heelal leef Legoete as hy meen slenters is nodig om die ANC in ’n slegte lig te stel?

Dit sal Legoete loon om bietjie deur die OG se boeke te blaai, waaruit Myburgh vrylik aanhaal. Of meen Legoete die OG se verslae is fopnuus?

Het Legoete werklik nog nooit tevore van die Vrede-melkplaas, Estina, en die R30 miljoen vir armes wat vir die Gupta-troue by Sun City help betaal het, gehoor nie?

Die nuus oor ’n bedenklike kontrak en bedenklike werk aan ’n behuisingsprojek by Bethlehem waarby Magashule se dogter betrokke is, is ook nie nuut nie en het juis onlangs weer skerp mediadekking, ook op SAUK-TV, gekry. Het Legoete vergeet dat dit al ou nuus is dat Magashule se een seun vir die Guptas werk, en die ander baie betrokke is by Vrystaatse tenders?

Dit blyk verder dat Myburgh deur die loop van sy ondersoek ’n lys van 60 vrae aan Magashule gerig het om op te antwoord. Magashule het nie daarop gereageer nie. Voorts berig News24 dat dié nuusmedium ook oor ’n ander ondersoek vrae aan Magashule gerig het, waarop hy nie gereageer het nie.

In die lig van die regsbeginsel dat “hy wat nie gereageer het toe hy kon en moes nie, word geag in te gestem het”, sou Magashule se stilswye sy kans op ’n suksesvolle hofsaak oor die boek nie veel gebaat het nie.

Volgens Luthuli-huis (waarvan Magashule self die bestuurshoof is) se mediaverklaring beoog Magashule moontlik regstappe. So eenvoudig sal dit egter nie wees as die uitgewer bewys lewer dat die oorwig van saakmakende inligting al lankal openlik in die openbare domein was, en dat nóg Magashule nóg die ANC tevore dit duidelik genoeg ontken het nie.

Maar gaan die nuus, wat in bykans enige ander land die finale spyker in Magashule se politieke doodskis sou wees, Ramaphosa so erg slaan soos hier voorgestel word? Magashule is immers geen vriend van Ramaphosa nie, en is opsigtelik deel van die faksie wat Zuma ondersteun. Die antwoord lê in Ramaphosa se stilswye nadat die boek bekend gestel is. Ramaphosa het nie onbeperkte mag om teen skandemakers op te tree nie, maar hy kon ten minste ’n beroep op Magashule gedoen het om in belang van die ANC terug te staan tot die bewerings in die boek behoorlik as onwaar bewys kon word. Magashule sou kwalik ’n ander keuse gehad het as om te bedank of “tydelik af te staan”.

Die lys van bedenklike figure wat die ANC bly koester en selfs op hul parlementêre kandidatelys plaas – sommiges selfs hoog op die lys, raak al langer en word bykans elke dag voor die Zondo-kommissie en ander ondersoeke langer.

Ramaphosa se stilswye (en selfs periodieke goedpratery van hopelose ministers) raak nou ’n onhoudbare gedawer. Terselfdertyd begin al meer vingers na Ramaphosa self wys, soos die sleutelrol wat hy as hoof van Eskom se “oorlogskamer” beklee het, maar dié instansie se dolle gejaag na die afgrond voortgeduur het.

Sy swye nadat die Menseregtekommissie met sy uitspraak oor Julius Malema en kie polarisasie in die land ’n hewige hupstoot gegee het, gaan onverskoonbaar blyk te wees, tensy Ramaphosa nou baie skielik wys van watter stoffasie hy gemaak is.

Die eerste geleentheid om die verstikkende lug te suiwer kom klaarblyklik Maandag wanneer die ANC se top-6, skynbaar ongeskeduleer, byeenkom.

’n Belangrike aanduider dat die druk op Ramaphosa onhoudbaar word, is dat oudpres. Kgalema Motlanthe, pas voor die boek se inhoud bekend geword het, gesê het die land is nou, ná die val van Zuma, slegter daaraan toe as daarvoor. Dit is harde woorde omdat Motlanthe geen vriend of aanhanger van Zuma is nie.

Die DA het in reaksie ook gesê daar is geen verskil tussen die ANC onder Zuma, en die ANC onder Ramaphosa nie. Dis ’n harde oordeel oor ’n man wat nie lank gelede nie nog in baie kringe ’n Ramaforie laat loop het. Sy eie hantering van die grondgrypkwessie het die Ramaforie laat begin afblaas, maar sedertdien skiet hy, gewoonlik deur strategiese stilswye, self gate in sy eie beeld.

Die Vryheidsfront Plus se lid van die provinsiale wetgewer en nasionale jeugleier, Tammy Wessels, sê in reaksie op die boek dit is duidelik dat daar ’n dringende amptelike ondersoek in die bewerings en aantygings wat in die boek gemaak is, moet geskied. Die VF Plus sê lankal reeds dat die Zondo-kommissie se ondersoek na staatskaping ook Ace Magashule moet insluit weens al die bewerings soos in die boek vervat. Dit is om hierdie rede dat die VF Plus reeds 13 Februarie 2019 aan regter Zondo geskryf en gevra het dat Magashule voor die kommissie moet verskyn weens al sy beweerde betrokkenheid by staatskaping.

Nog ’n groot fout is dat Ramaphosa weier om aan ’n openbare presidensiële debat deel te neem. Iemand wat niks het om oor skaam te wees of weg te steek nie, laat nie so ’n kans verbygaan terwyl die donker wolke besig is om saam te pak nie.

Om nou gesien te word as iemand wat die erg gediskrediteerde Magashule koester, kan amper nie op iets anders as ’n ramp uitloop nie.

Maar dan … dis die ANC waarmee die land nou te kampe het. In akademiese kringe is lankal gesê ’n nasionale skande word nie in die ANC as skande ervaar nie. Maar dit sal ’n skande wees as so ’n geestesdwaling juis die oorsaak is dat die organisasie nie by die stembus gestraf word nie.