Nuuskommentaar: Misdaad-anargie: Is daar ’n verband met grondeise?

misdaadtoneel

Argieffoto

“Anargie is ʼn woord wat die VF Plus nie ligtelik gebruik nie. Dit is ʼn toestand in ʼn land waarin geen gesag geld nie, waarin niemand reëls of wette gehoorsaam nie en waar die regering geen beheer uitoefen nie. Suid-Afrika stuur in hierdie rigting.”

Só sê die Vryheidsfront Plus se leier, dr. Pieter Groenewald, oor die golf van misdaad wat oor die land heen spoel. Verskeie mense is vermoor, maar in hierdie nuuskommentaar word op die konflikpotensiaal van dreigende grondonteiening sonder vergoeding, eufemisties as grondhervorming verdoesel, gefokus.

Voor die soeklig op die grondkwessie aangeskakel word, word na die misdaadgolf verwys, soos deur Groenewald verwoord: “Misdaad is lank reeds buite beheer in Suid-Afrika, maar gebeure oor die laaste paar dae laat die gevaarligte helderrooi flikker oor die staat se onvermoë om die publiek te beskerm. Indien misdaad nie nou gestuit word nie, is anargie onafwendbaar en die VF Plus doen ʼn dringende beroep op die regering om die gevaartekens nie langer te ignoreer nie.

“Genoeg is genoeg,” sê die TLU in sy reaksie op die misdaadgolf wat oor die land spoel, en veral skrikwekkend wreed op die landbou toeslaan. “Sonder boere is daar nie kos op ons tafels nie, gaan u as insetverskaffer ook nie meer kan bestaan nie en gaan groot dele van die platteland totaal tot niet gaan. Dit is hoe ernstig die situasie is in die lig van die enorme groei in aanvalle en moorde tans. Dit terwyl groot dele van die land se boere onder ’n vernietigende droogte gebuk gaan en te kampe het met deurlopende diefstal van landbouprodukte en vee.”

Henry Geldenhuys, adjunk-President van TLU SA, het gewaarsku dat sake nie langer so kan aangaan nie, en dat daar ’n werklike gevaar is dat die pot in ons land gaan oorkook.

Groenewald lys die vernaamste probleemareas soos volg:

  • Die besettings van Kaapse plase, aanvalle op vragmotors landwyd en die vernietiging van treine en treinwaens in die Kaapse Skiereiland kan nie langer as geïsoleerde voorvalle afgemaak word nie. Die feit dat dit ongehinderd voortduur, wys die staat het sy intelligensievermoë ten opsigte van misdaadvoorkoming feitlik totaal verloor.
  • Die rede hiervoor is die onbevoegdheid van politieke en operasionele personeel en die feit dat die vermoë wat wel oorgebly het, oor die laaste jare hoofsaaklik aangewend is in politieke binnegevegte van die ANC en die regering.
  • Suid-Afrika betaal nou ʼn duur prys daarvoor en dit kan aansienlik versleg aangesien die ekonomie en misdaad direk gekoppel is. Misdaad striem ekonomiese groei, en ʼn swak ekonomie en gepaardgaande werkloosheid lei tot misdaad.
  • Gister is Stefan Smit (62), eienaar van die internasionaal bekende wynlandgoed Louiesenhof buite Stellenbosch, in sy huis vermoor terwyl hy aandete genuttig het.
  • Enkele weke gelede is Tool Wessels op sy plaas net buite Bonnievale vermoor nadat hy wreed gemartel is en verlede Vrydag is Monica (68) en Basil Deniacos (79) in Dealesville vermoor. Dit is slegs enkele van talle ander moorde en aanvalle reg deur die land oor die laaste weke.
  • Vyftien plase, waaronder die bekende wynlandgoed D’Aria by Durbanville net buite Kaapstad, moes onlangs die hof nader vir bevele om besetters van hul grond af te kry nadat die EFF briewe versprei het onder werkers waarin mense aangehits is om grond te beset.
  • Luidens mediaberigte was die BLF-leier, Andile Mngxitama, se naam op die briewe waarin mense aangesê is om “landbougrond van wit diewe af te vat”. Selfs nadat ʼn uitsettingsbevel in die D’Aria-geval toegeken is, het Mngxitama glo gesê die BLF en sy volgelinge sal bloot “ander plase teiken”.
  • Sewentien swaar vragmotors is gister aan die brand gesteek in ʼn reeks voorvalle in Gauteng, KwaZulu-Natal, die Wes- en Oos-Kaap en Mpumalanga.
  • In Kaapstad is twee treine en verskeie waens die naweek aan die brand gesteek. Verlede maand het tien waens op die Kaapstad-stasie uitgebrand met ʼn geraamde skade van R33 miljoen. Dit vorm deel van ʼn reeks aanvalle oor ʼn lang tydperk op die Kaapse Metro-treinstelsel.
  • In Alexandra, Johannesburg, het inwoners mede-inwoners se huise aan die brand gesteek nadat die Johannesburgse metropolisie onwettige strukture laat afbreek het. Verlede Vrydag is ʼn kliniek in die Strand naby Kaapstad aan die brand gesteek en totaal verwoes.

Anarkapokalips

Anarkapokalips, soos ’n Amerikaanse koerant dit in ’n ander verband gestel het.

Bogenoemde wys dat daar ernstige gebreke in die polisie en die misdaadvoorkomingsorgane van die staat is. Vervolging en strawwe is ontoereikend en dien nie as voldoende afskrikmiddel nie.

Tradisionele konsepte oor grondbesit deur swart mense verskil aansienlik van dié van wit mense, of eerder dit het aansienlik verskil. Dr. Wynand Boshoff, nuwe VF Plus-wetgewerlid in die Noord-Kaap, verduidelik die verskille mooi – ook die oorspronklike konsep van die KhoiSan hier.

Ook kenners van Xhosa of die Xhosa-kultuur wys op ’n nader idee. So word verduidelik dat “eienaar” in Xhosa “umininto” is (foneties umnikazi). Dit beteken gewoonweg die een aan wie dit gegee is. Nooit die een wat dit besit of verkry of gekoop het nie, maar bloot die een aan wie dit gegee is.

Dit bring ons dan by grondeienaars. Jy is nog nooit erken as grondeienaar nie, maar eerder die een aan wie dit gegee, selfs geleen is. Dit bring die wit eienaar dus verder erg onder verdenking want “wit grond” is dus iets wat aan wit mense gegee is – nie wat aan wit mense behoort of wat hulle verkry of verdien of gekoop het nie – maar altyd gegee is en daar hang dit in die lug.

Dit verklaar ook baie van die wanbegrip oor eiendomsreg.

Ook die verduideliking van ’n volkekundige uit die sogenaamde ou skool sluit ten nouste hierby aan. Die grond wat die Voortrekkers en later wit grondkopers by swart kapteins verkry het, hetsy deur ruil of andersins, was nooit bedoel om van die stam, of die kaptein as paghouer, vervreem te gewees het nie, maar eerder as ’n soort bruikleen. Getrou aan die Westerse konsep, het die wit mense dit as wettig gekoop beskou.

Stefan Smit is Sondag, 2 Junie 2019, op die Louiesenhof-wynlandgoed vermoor.

Dr. Wynand Boshoff van die VF Plus skryf verder soos volg: “Terwyl Boererepublieke swart stamhoofde sover moontlik in beheer van hulle gebiede en mense gelaat het, wou die Britte tradisionele gesag met Britse gesag vervang. Blanke boere is in stroke in swart gebiede gevestig. Engelse spekulante het grond van stamhoofde, vir wie die begrip van ewigdurende indiwiduele grondbesit vreemd was, gekoop.

“Swart grondaansprake is telkens deur die dokumente en Westerse betekenis van grondbesit gefnuik. Hulle enigste vreedsame verweer was howe, wat natuurlik die gesag van dokumente gehandhaaf het. Gewelddadige optrede is deur blankes as ongemotiveerde ‘opstandigheid’ beskou en onderdruk.”

In Mei verlede jaar is die kwessie van grondbesit by Unisa bespreek en verskeie partye en instansies het deelgeneem. In die proses is die Cope-leier, Mosioua Lekota, deur veral EFF-lede uitgejou toe hy daarop gewys het dat die KhoiSan die werklike oorspronklike eienaars was, en later het gevegte tussen lede van die EFF en die ANC uitgebreek.

’n Aspek wat deurgeskemer het, is die opvatting dat daar genoeg tyd verloop het dat almal in werklikheid ’n gemeenskaplike begrip oor grondbesit het, maar dat die tradisionele opvatting uitgebuit word. By ’n ander geleentheid sou die destydse pres. Jacob Zuma vra hoe anders die wit mense aan hul grond gekom het as dit nie van swart mense gesteel is nie, terwyl die ad hoc-komitee oor grondbesit daardie opvatting die “groot leuen” genoem het.

Die ad hoc-komitee het bestaan uit onder andere Agri SA, die TLU SA, AfriForum, die Afrikanerbond, die FW de Klerk-stigting, die ATKV, Regslui vir Afrikaans, die Gereformeerde Kerke van Suid-Afrika, die DA, die VF Plus en die ACDP. 

ʼn Potensieel ewe gevaarlike voortvloeisel van die misdaadsituasie is die rassewrywing wat dit veroorsaak. Die VF Plus sê hy sal ernstig met die regering oor misdaad in gesprek tree, en sal aanhou om die internasionale gemeenskap bewus te maak van die ANC se onvermoë om te regeer.

Daar moet indringend aandag gegee word aan landelike beveiliging en die hulpbronne tot die polisie se beskikking in veral landelike gebiede om misdaadvoorkoming te prioritiseer.

Benewens die kwessie van wetstoepassing wat Groenewald genoem het, is daar wat spesifiek die grondkwessie betref, ander dieperliggende faktore wat aandag moet kry.

Die eerste is dat die konsep van die KhoiSan as eerste nasie behoorlik erken word (ook deur die publiek) en wetlike en internasionale egtelike erkenning kry – ook deur die nageslag self. Sonder dié erkenning word nie net wit mense se aanspraak op hul wettige grondbesit in gedrang gebring nie, maar ook die KhoiSan en hul nageslag.

ʼn Tweede is dat die historiese feite by almal bevestig word, en die tradisionele opvattings verstaan word, maar dat dit nie die reg op behoorlike en regverdige vergoeding kan verdring nie.

Laastens moet die kommersiële boere wat van die begin af die hande van vriendskap aan beginnerboere uitsteek, se hulp met dank aanvaar word, en nie soos nou dikwels gebeur, weggeklap word nie.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

22 Kommentare

Afrikaan ·

Baie goeie artikel, maar al die gepraat bring ons ongelukkig niks verder nie. Vir jare praat ons hieroor, plant ons kruise, dreig ons oor potte wat oorkook maar wat het die regering en polisie hieraan gedoen?? Ek besef dat ek ook maar net nou praat, maar iemand, of ‘n instansie sal moet leiding neem om die witmense in die land te lei om ons eie polisiering te doen. Die regering en sy kaders is besig om al hande-klappend te kyk hoe ons nasie uitgeroei word. Ons apatie (oftewel politiese korrektheid) oor hierdie saak moet stop.

Mel ·

Ja jul sê dit kan nie so aangaqn. Dit gaan so want ons wit volkie praat net.. daar moet aksie geneem word

Ou hommeltuie ·

Kry solank ou hommeltuie wat nog werk in die hande……hulle mag dalk duurder wees as die nuwes weens hulle nie geregistreer is met die owerhede nie. Dink bietjie….onverhinderde en onopspoorbare toegang orals.

Basjan ·

Johann v Heerden, geweld is die enigste ding wat hulle verstaan. Praat help nie. “From a place you can’t see, comes a sound you will never hear.”

Essie ·

Jy kan n perd water toe neem maar as hy nie wil drink nie kan jy niks doen nie net so al het jy die wêreldse grond en weet nie hoe om te boer nie help dit jou niks

Wonner ·

Een ding moet ons ook weet..om hulle te dreig met voedselsekerheid help ook niks want as hy genoeg het vir vandag is hy tevrede.

marco polo ·

Ek kuier op die oomblik in SA en is absoluut stomgeslaan deur die agteruitgang en apatie onder mense. Dit wil voorkom asof mense bet eenvoudig afgestomp is deur die vlakke van geweld en net dankbaar is dat dit nog nie met hulle gebeur het nie. Die abnormale het nornaal geword. Ek sien uit daarna om terug te keer na n normale land waar ek veilig is.

AJ. ·

Dit is die werk van die ANC. Hulle het mos gese dad hulle die Kaap onregeerbaar wil maak.

C VL ·

Goeie artikel. Wat almal egter vergeet: as almal bly agtertoe kyk, gaan niemand vooruit nie. Dis nie te sê ons moet die verlede vergeet en agskryf nie. Maar ons moet in die belang van groei en vooruitgang optree. Magshonger politici het ons al so verdeel, haat aangeblaas en mislei dat ons nie die groot prent sien nie.

Mia Joubert ·

Kan ‘n kenner sê of ons ‘n impak kan maak deur inkomste belasting en eiendoms belasting te weerhou. Ek weet dis onwettig om eiendoms belasting te weerhou, maar die huidige toestande in ons land vra vir drastiese aksie hetsy deur Afriforum, OUTA en ander instansies. Ons kan tot kollektief bydra tot regskoste van ‘n organisasie wat kan help. Dit kan nie langer so aangaan nie

Pieter ·

Ek wonder of die vraag korrek is. Moet daar nie eerder gevra word tot in watter mate is daar ‘n veband tussen die moorde en politieke partye nie. Baie van die leiers se uitsprake laat my maar net wonder.

Gert ·

Hierdie is nou weer ‘n verskoning wat iemand uitgedink het om die swartes se grondgyp te regverdig. Ons weet tog dat die ooreenkomste daardie tyd was om grond te koop, nie om dit te leen nie. So het die Swazi-koning dit ook onlangs bevestig. Nou kom hierdie siek storie uit dat die grond net geleen was, en hoe verdedig jy jouself daarteen?

Willem Grobler ·

Die grondwet is ‘n grap. Hoe het die grondwet één van die vermoorde witmense gehelp? Die grondwet kom handig te pas vir die moordenaars, korruptes en kriminele – word hulle dalk per geluk gevang, beskerm die grondwet hulle maar nooit die slagoffers nie. Wat nodig is is strafkommandos wat doen wat die naam impliseer: Stráf! Maar dit kan nie gebeur nie want die grondwet staan in die pad en beskerm dié wat straf verdien.

Andreas ·

Die kruks van die storie is hierdie “ongehoorsaamheid” het nie stadig soos ‘n dief in die nag die land bekruip nie, nee gaan kyk gerus hoeveel jaar gelede boere al verdag gemaak is, waar dit begin het, hoe dit eskaleer het, lone wat te min was, ens, almal het lippe afgelek vir selfs werkers wat aandele moet kry, Fransman was een wat in die Wes Kaap die een betoging na die ander gelei het. Die EFF het ook van so tyd gelede die krane opgedraai, die BLF.

Die rooi ligte het in effek baie lank gelede al begin flikker, maar nee, toe word die ANC ook lank voor die verkiesing deur die EFF oor die grondkwessie op sleeptou geneem, hulle kon nie agterbly nie, hulle was bang hulle verloor stemme aan die EFF, die vure word aangeblaas vir maande, Solidariteit en Afriforum kla, die VF Plus en wys met statistiek wat besig is om te gebeur, maar hoe nader dit aan die verkiesing kom hoe meer en dringender raak Cyril se toesprake oor grond, hy sien nog nie die rooi doek nie.

En nou?

Andreas ·

Dan, die volgende kan mens byvoeg tot die ANC-regering se “suksesse”, die jongste berig is oor die SAUK en die Guptas, lees maar net al die ander berigte die afgelope paar dae op Maroela, Jan-Jan Joubert berig vanmiddag hier oor die ekonomie wat gekrimp het, ek het juis onderaan die vorige rubriek van Herman Toerien geskryf, Cyril is nie in beheer van die land nie.

Andreas ·

Hierdie per ‘n berig laatmiddag op Netwerk24:-

Polisie moet plaasaanvalle hanteer, meen Cyril:
“Ten spyte van pleidooie vanuit plaasgemeenskappe dat pres. Cyril Ramaphosa hom uitspreek teen misdaad op plase, gaan hy dit nié doen nie.”

Andreas ·

Cyril sal geen, maar geen uitspraak teen misdaad op boere gee nie, want hy is bang dit sal deur die ANC en sy volgelinge gesien word as empatie met wit mense/boere. Mens weet nooit, dalk is dit werlik hoe hy in sy hart voel, soos ‘n Pilatus, los dit vir die polisie.

Andreas ·

Ace Magashule sê gister werkloosheid is ‘n nasionale krisis. Cyril sê gister hy gaan hom nie oor misdaad teen boere uitspreek nie, dis die polisie se werk, nou het ons ook finaal sy sentiment oor wat hy vir ‘n boere se lewe en veiligheid voel gehoor.

Hierdie is genoeg om te besef die land is nie net in ‘n jammerlike toestand nie, maar word deur die ANC regering en Cyril gefaal. Hier moet mens dan nog hul miskenning van minderhede se menseregte byvoeg, dan sien mens die burgers en veral die Afrikaanssprekendes is aan hul eie lot oorgelaat.

Ons is al eintlik ‘n paar kerwe laer as rommelstatus, maar die graderingsagentskappe besef as hulle die werklikheid in hul gradering moet weerspieël, sal dit die doodskoot wees waarvan die land moeilik gaan herstel, indien enigsins. Hulle gee dus die vier here (ministers) aan die hoof van die ekonomie nog blaaskans, o ja, en vir Cyril se haas.

Sarel ·

Die metode wat gevolg word is om jou slagoffers stelselmatig af te takel tot op die been. Wanneer die ” slagoffers” so afgetakel is in sy geloof en kultuur en julle self oorgee aan moedeloosheid en gedagte en belefigings onder mekaar dan is die stryd gewone. Die slagoffer vernietig homself. Al wat die aanvaller te doen staan is om.niks te doen nie.

John ·

CR is ‘n gevangene in die Lethuli-stroois. Hy is eintlik van strooi gemaak… Sou hy kwiek, kry hy die buiteband om die nek. Wie is derhalwe in beheer van die land. Die Z-bende; en almal wat reeds in die kommissie geìmpliseer is. Skaamteloos staan Ace ‘n ou toespraak van Castro aan die land en voorlees oor hoe die bedeling gaan uitsien en hoe hulle glo die land gaan regruk… huh?… En die volk glo dit? Kyk hoe lyk Kuba. Hy lees nog swakker as Zuma. Die land is onder beleg, burgers!

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.