Nuuskommentaar: Plaasaanvalle en die gevurkte tong

Foto: Reint Dykema

Sommer met die eerste geleentheid wat pres. Cyril Ramaphosa gehad het om daad by die woord te voeg nadat hy beloftes oor die veiligheid van landbou gemaak het, het die president gevou. Nou val dié kleinkoppietrek nog saam met die slegste ekonomiese nuus vir die land in ’n dekade.

’n Motoris ry ’n straatsmous om. Die skeel motoris is woedend en gil op die smous wat ’n paar happe slingersous in het: “Vir wat kan jy nie kyk waar jy loop nie?” Die straatsmous wip hom toe. “Nou kan meneer dan nie ry waar meneer kyk nie?”

Pres. Cyril Ramaphosa het soos ’n vars briesie onder die kleihelde ingeklim.

Dan Kriek, president van Agri SA, sê Ramaphosa het voor die verkiesing beloftes gemaak dat boere beveilig sal word, en die landbou eis nou dat Ramaphosa daad by die woord voeg. Ook ander landbou-instansies asook ander belangegroepe het vol verwagting daarna uitgesien dat Ramaphosa nou daad by die woord gaan voeg.

Toe nou nie.

Ramaphosa het uiteraard ’n ander probleem. Nie baie lank terug nie het hy AfriForum en onder andere ook pres. Donald Trump van die VSA se stellings oor plaasmoorde probeer weerspreek. Daar was, volgens wat Ramaphosa gesê het, nie plaasaanvalle in Suid-Afrika nie. Met die terugkrabbelslag het hy aangedui dis nie wat hy bedoel het nie. Uiteindelik het hy soos die skeel motoris hierbo gelyk wat skynbaar in een rigting kyk, maar in ’n ander ry, en in die proses die voetganger verwar.

Die ganse situasie staan in die konteks van die jongste BBP-syfers vir Suid-Afrika in die eerste kwartaal vanjaar. Die ekonomie het in daardie kwartaal met -3,2% agteruit geboer, die meeste die afgelope tien jaar.

Die slegte syfers van 2009 het gekom te midde van ’n wêreldwye ekonomiese krisis. Die nuwe agteruitboerdery het Suid-Afrika heel knap op sy eie behaal. Trouens, dit kom nou te midde van ’n groot openbare geloof dat Ramaphosa se verkiesing die ekonomie positief sou beïnvloed, volgens die ACDP.

Die Vryheidsfront Plus is selfs nog krasser in sy oordeel. Adv. Anton Alberts, nasionale voorsitter van die VF Plus, sê in sy reaksie die land se ekonomie betaal nou die prys vir die ANC se oorlogsverklaring teen Suid-Afrika.

Die ANC se voorneme om die Grondwet so te wysig dat grondgryp sonder vergoeding moontlik sal wees, pomp ’n erg ysige boodskap in die pap ekonomie in.

Pres. Cyril Ramaphosa. Foto: Jairus Mmutle/GCIS

“Die ANC se oorlogsverklaring teen die land het reeds begin met die verskerpte maatreëls rakende swart ekonomiese bemagtiging en regstellende aksie. Daarmee saam het faktore soos staatskaping, hoë misdaadsyfers en voorgenome onteiening sonder vergoeding ʼn perfekte storm gevorm om die land se ekonomie te beskadig.

“Dit is die rede waarom buitelandse beleggers wegbly en die ANC het sodoende ook oorlog verklaar teen tradisionele buitelandse vennote soos die Europese Unie (EU) en Amerika en die land kry nie meer die nodige beleggings nie aangesien beleggers geen vertroue het in die ANC om die ekonomie te bestuur nie.”

Plaasveiligheid speel ’n enorme rol in die uitwerking wat plaasaanvalle op die gemoed van die landbou het, en dus ook die ekonomie.

In sy reaksie op die dood van die Bolandse boer Stefan Smit het Kriek gesê: “Plaasaanvalle is ’n probleem wat oor ’n lang tyd nie die nodige aandag van nasionale regering ontvang het nie. Plaasaanvalle is meestal brutaal en gewelddadig met ’n wye impak op die naasbestaandes en die gemeenskap. Agri SA ondersteun Agri Wes-Kaap en die provinsiale regering se werksaamhede en het reeds met pres. Ramaphosa geskakel om onmiddellike optrede te eis. Plaasveiligheid, vir boere en plaaswerkers, is Ramaphosa se eerste prioriteit teenoor die landbougemeenskap.”

Die laaste ding wat enige verantwoordelike burger wil hoor is dat die president se woordvoerder sê: “Hoewel Ramaphosa bewus is van die oproepe dat hy hom self oor die plaasaanvalle uitdruk, het hy besluit om hom nie oor spesifieke soorte oproepe uit te laat nie. Ramaphosa voel die SAPD is die regte instansie om hulle hieroor uit te laat.”

Maar Ramaphosa moet nou leer wat dit beteken om te sê hy wil almal se president wees. Hy kan dit op sy maag skryf as hy nie daadwerklik selfs nie eens duidelik hom oor die ergste krisis in die landbou wil uitlaat nie. Ramaphosa het baie onlangs nog sekere versekerings aan die landbou gegee. Om dan met die eerste geleentheid om woord by die woord te voeg, laat staan nog die daad by die woord te voeg, kopsku te wees, is bedenklik.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Andreas

Cyril is uit sy diepte uit, en dan het hy nie baie ‘diepte’ nodig nie.

Guve

CR stel ni belang ni, want plase is ni myne ni

Agnes

K staan vir kannie.
Hoop vergaan, net n wonder werk sal verandering kan bring

Trojaanse Donkie

Die duitsers noem dit “Schadenfreude”, nou wonder ek net aan wie se kant is dit

Oud Rhodie

Mnr. Beyers Truter en meelopers wie nog onlangs vir Ramaphosa as die gesalfde een beskou het – wat sê julle nou ? Bel hom gou so bietjie en vra wat aangaan. Hy het dan so mooi belowe en kyk nou.