Nuuskommentaar: Positief. Ons móét positief wees. Kloekmoedig afgestof

Om neerhalend na iemand wat die land se toekoms negatief beoordeel vinger te wys, klaar nie die negatiewe denke op nie – dit steek eerder die lont aan. Tog hou dit ’n wye reeks voordele in om ’n blymoedige mens te wees, maar dit kort ál harder werk om te midde van wavragte negatiewe nuus positief te bly.

Dit verg nie veel van ’n profeet wees om te weet dat vanoggend se opskrif ook heelwat argwaan gaan ontlok nie. Baie Suid-Afrikaners is boos oor die tempo waarin die ANC die land by die status van ’n piesangrepubliek aangesleep bring. Sommiges meen die koeël is onomkeerbaar reeds deur die kerk, ander meen die ANC maak so droog, daar is geen manier dat die ANC deel van ’n herstelproses kan wees nie.

Min mense sal verskil daarvan dat die afgelope drie dae se nuuskommentare, wat as ’n trilogie van negatiwiteit beskryf kan word, nou nie juis die positiewe alternatief belig nie, tog het die lesers goed op die drie stukke gereageer. Heelwat het hul frustrasie aangedui dat hulle weens verskeie faktore nie die land kan verlaat nie.

Tonne positiwiteit is immers al voorheen uitgestort om van Suid-Afrika ’n modelstaat te maak, maar dinge boer nou/steeds gewoon agteruit.

Maar aldus die ekonoom, dr. Roelof Botha, sing die mense se opvattings en die werklikheid soms verskillende deuntjies. Sy artikel hieroor op Netwerk24 het verskyn onder die titel “Syfers wat die suurknolle graag miskyk”.

Dit is egter nie net verbeelding dat Suid-Afrikaners redelik die hoenders in is oor hoe sake gaan nie. Die jaarlikse World Happiness Report van 2019 plaas Suid-Afrika 106de uit 156 lande. Die uitslae en werklike, objektiewe feite loop egter nie altyd saam nie. So tel Paraguay en Panama onder die gelukkigste lande, terwyl meer as die helfte van die VSA se inwoners te midde van ’n ekonomiese opbloei negatief is. Daarteenoor is slegs ’n derde van die wêreldbevolking negatief.

Positiwiteit, en positiewe denke, word graag as wonderlike deug voorgehou.

As positief en positiwiteit sulke wonderlike aanwinste is, hoeveel keer kom dié woorde in die Bybel voor?

Nie een keer nie. Nóg in die 1953- nóg in die 1983-vertaling, en ook nie in die Bybel vir Almal nie.

Dit beteken egter nie dat die Christen nie positief mag wees nie. Trouens, motiveringsprekers wat “positive thinking” as tema inspan, wend hulle dikwels tot die Bybel vir inspirasie en inhoud. Daar is baie woorde wat maar skraps in die Bybel gebruik word, of glad nie, en tog sentraal staan in die Christen se wyse van gedrag openbaar.

Die woord “dankie” kom byvoorbeeld glad nie in die 1983-vertaling voor nie, en in die 1953-vertaling is dit eweneens so skaars soos hoendertande. Die woord “asseblief” kom in die 1983-vertaling 43 keer voor, en in die 1953-vertaling net vyf keer. Dit dui eerder op ’n wyse van taalaanwendig, en selfs die afwesigheid van sekere woorde in die Bybelse tale dui eerder op destydse taalmaniere as op swak maniere.

Selfs sonder die spesifieke woord “positief” bevat die Bybel talle voorbeelde van woorde en uitdrukkings wat inhoud gee aan positiewe denke. Lees gerus hier.

Op Facebook het verskeie bekendes hul menings gelug oor alternatiewe woorde wat die Bybel moontlik in plaas van “positief” gebruik. Dit sluit in hoopvol of vertroue, hoop, blymoedig, “Wees bly in die Here” of “Verbly jou in die Here” en “Vind jou vreugde in die Here en vertrou op Hom”. Mens kan realisties wees sonder om alles te verdoem: “Daar waar jou hart is …”

’n Behoorlike vloedgolf van lesers is volgens hul lesersterugvoer uiters negatief oor die toedrag van sake in Suid-Afrika. Intense teleurstelling ná ’n opgeblase euforie neig om ’n pot euforiese trauma of depressie te veroorsaak, en met die Ramaforie se inploffing was dit ook nie anders nie.

Vanoggend wil ek ’n oproep op die positiewe doen, hopelik met die vorige dag se nuus as inspirasie. Vanoggend se raadpleeg van nuusbronne lewer ook ’n skraps oes aan positiewe nuus op.

My verskoning dat die eie voorbeeld nou hier gebruik word.

Die uwe het wel self gister ’n stewige toets oor positiewe denke en nuus deurloop. Die afgelope net meer as vier jaar kry die uwe behandeling vir wat as ’n ongeneeslike maar nieterminale kanker, Waldenstrom, beskryf word. Aanvanklik was daar nog ’n tweede kanker wat nou al ’n ruk in remissie is. Gister was ’n belangrike D-dag. Die aanduidings was dat die chemo wat die laaste jaar ingespan is, ’n baie positiewe uitwerking het, en daar is inderdaad groot beterskap. Gister sou die internis die uitslag gee – is die herstel genoegsaam dat verdere behandeling vir eers nie meer nodig sou wees nie, of moet dit voortgesit word. Die uitslag was dat daar steeds kankerselle aanwesig is, en nog minstens een sesmaandekursus se behandeling nodig is. Ek kan egter nou eers ’n blaaskans kry.

Of dit positief is of negatief, hang van die mens se eie beoordeling af. As ’n mens my toestand met ’n jaar gelede vergelyk, is dit sommer baie positief. Toe was ek 21 dae aaneenlopend in die hospitaal met griep en longontsteking. Drie maal het die internis gemeen ek gaan dit nie maak nie. Ek was dikwels in ’n rolstoel, was erg maer, en bitterlik swak. Nou is ek, ondanks reeds 36 chemo’s die afgelope vier jaar, al baie sterker, swaarder en gesonder. Ek het die vooruitsig van nog ses chemo’s, en dan waarskynlik ’n paar jaar remissie. Ek kon met ’n lekker hart van die hospitaaltjie (wat die afgelope paar jaar my tweede tuiste is) se personeel vir eers afskeid neem. Vir my voel dit positief, al is dit effe gedemp, maar gisteraand het ons die eerste oproep gekry om te simpatiseer oor die slegte nuus.

Wees kloekmoedig. Dis miskien die belangrikste boodskap wat ek nou vir myself het. Wat dit in sekere sin makliker maak, is dat die nuus die afgelope ruk oor die algemeen baie positief – selfs oorweldigend positief was.

Dit geskied egter teen die agtergrond van die feit dat nieterminaal maar ook as ongeneeslik beskryf word. Klinies is die beste waarop ’n mens kan hoop dat fases van “onder beheer” bereik kan word, fases wat volgens die literatuur gewoonlik so twee jaar duur, maar soms langer, en daar was volgens die jongste literatuur wat ek gesien het, enkele gevalle wat nooit teruggekom het nie. (Dis toe die woord “kloekmoedig” in my gedagtes opkom. Dit word as verouderd beskou, en is Nederlands én Afrikaans. Dit kom in Gesang 75:1 voor.)

Dit word soms bloot met die woord “dapper” verklaar, maar ook woorde soos stoutmoedig, onverskrokke. Gedra u manlik, manhaftig/manmoedig. “Onversaagd” word ook ingespan. In Nederlands word onversaagd “op onversaagde wijze” naas dapper ingespan.

O Here, gee my asseblief die krag daartoe.

Dit is interessant hoeveel wenke oor positiewe denke behels dat iets gedoen moet word om positiewe denke te ontwikkel – dis nie iets wat sommer vanself gebeur nie. Daar is talle verwysings wat vra dat mense hul brein moet herprogrammeer.

Is dit nie baie negatief om van die standpunt uit te gaan dat negatief wees die natuurlike houding is, en dat positief daarenteen harde werk vereis en dus eintlik ’n onnatuurlike toestand is nie?

Die beloning is dat jou positiewe denke jou sukses sal bepaal.

Is hierdie soort denke noodwendig realisties? Hoeveel van die boere wat onlangs weens die ongekende droogte die handdoek ingewerp het, was noodwendig negatief voor die droogte? Het baie nie dalk positief uitgesien na die volgende paar jaar nie? Is hul ondergang werklik aan negatiewe denke te danke?

En dan is ’n mens nog net by positiewe denke, en nie ten volle positiwiteit nie.

Klik hier om meer te lees.

Gesindheid

“Jou gesindheid maak ’n verskil!” lui ’n opskrif.

Wat dink jy het die grootste uitwerking op jou geluk?

  • jou omstandighede
  • jou gene
  • jou gesindheid

Party sou “omstandighede” kies. Hulle sê dalk: “Ek sou gelukkig gewees het …

  • “as ek maar net meer geld gehad het”
  • “as ek maar net gelukkig getroud was”
  • “as ek maar net gesonder was”

Maar in werklikheid het geluk dikwels meer te doen met jou gesindheid as met jou omstandighede of jou gene. En dit is goeie nuus. Waarom? Want anders as jou omstandighede of jou gene – waaraan jy min of niks kan doen nie – kan jy iets aan jou gesindheid doen.

’n Goeie geneesmiddel

’n Bybelspreuk sê: “’n Vrolike mens is ’n gesonde mens, ’n neerslagtige mens raak uitgeput” (Spreuke 17:22, Nuwe Afrikaanse Bybelvertaling). Met ander woorde, jou gesindheid maak ’n verskil! Dit kan bepaal of jy ’n doelwit bereik of tou opgooi en of ’n tragedie die beste of die slegste in jou na vore bring.

Party mense stem dalk nie hiermee saam nie. Hulle sê dalk:

  • “Hoekom moet ek maak asof alles goed gaan?”
  • “Positiewe denke gaan nie my situasie verander nie.”
  • “Ek sal eerder realisties wees as om in ’n droomwêreld te leef.”

Hierdie besware klink dalk geldig. Maar dit is voordelig om ’n positiewe uitkyk te verkry.

Die Daily Maverick skryf hieroor soos volg: “Life is complex and happiness, like other emotions, doesn’t exist in a vacuum.”

Miskien bied die lied, “Tel jou seëninge, tel hul een vir een”, ’n goeie manier om die pad na positiwiteit aan te pak.

Baie sterkte.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

22 Kommentare

Wicus ·

Dankie vir die positiewe boodskap Herman, doen so voort

Baie sterkte op jou pad.

Tilly ·

Baie dankie vir jou positiewe berig. Ek is baie jammer om te hoor waardeer jy is en is baie bly dat jy beter is.

Ek wil net byse: Daar is n groot verskil tussen die land wat in n gemors is en jou gesondheid.

Die land se korrupsie, moord, verkragting, ens is nie regtig iets waaroor n mens kan positief wees nie.

Gesondheid, skuld, huwelik, ens is in enige land (daaraan kan n mens werk of ten minste iets daaraan doen), ons land se probleme is heeltemal n ander storie.

Willie ·

Interresant hoe Goddelose mense beskryf word… Dankie vir die positiewe boodskap, mens vergeet baie maklik..al is dit moeilik

Dries ·

Di President beloof 1 000 000 werke in 10 jaar – dus gemiddeld 200 000 per jaar. Maar, ons stoot ongeveer 600 000 nuwe werkers, na skool, elke jaar in di werkmag in. Dus, sal ons steeds in hierdie opsig, agteruit boer!
AL di SBO’s se gesaamentlike skuld is by di 1 000 Miljard – dus verlore vir di opbou van di ekonomie.
Di Staat leen DAAGLIKS, meer as n Miljard.

Op 16 Desember 1838, kom ongeveer 150 mense te staan teen n oormag van 5 000. Di uitslag is Geskiedenis…

Di verskil tussen vandag en toe, is di onwrikbare geloof van di handvol gelowiges, wat destyds teen di oormag te staan gekom het…

Werner ·

So ons moet maar blymoedig die afgrond in solank ons net nie die waarheid bekend maak nie

Dries ·

Werner, ek weet ni watter van di net 3 ‘waarhede’ wat ek genoem, het by jou verby gegaan ni.
Terug na 1838, sou jy ni vandag hier gewees het, indien di handvol destyds, ni hul vertroue in God, eerders as op wapens en ‘feite’ gestel het ni.
Soos Herman getuig het, is n pad saam met di Here, ni sonder dorings ni…

Wicus ·

Dis juis blymoedige mense wat iets aan die situasie gaan doen ……

Kallie ·

Om op die ANC en hul kiesers te steun is ‘n mors van tyd. Hulle het ons reeds oor die afgrond gestoot. Maar nou moet ons na alternatiewe oplossings soek om te oorleef. Deur saam te werk kan ons ‘n goeie bestaan voer, onder die radar en uit die kloue van die magshonger ANC. Diè wat oplossings het moet net nederig bly.

Klipindiebos ·

Die inhoud van hierdie artikel is baie bemoedigend en goeie navorsing is gedoen. Dit gee beslis hoop, maar dit is seker nie verkeerd om op jou hoede te wees nie. Dit is juis een van die lewensmeganismes wat die mens vestig wanneer oorlewing tersprake is. Een van die belangrikste opdragte van die profete Esegiel (13), Amos (3-4) en Sagaria (1) was om Israel te waarsku teen “valse gerustheid” Satan is voortdurend besig om sy taktiek te verander. In plaas daarvan dat hy hom voordoen as ‘n brullende leeu, koer hy soos ‘n duif en praat hy soos ‘n lam om die kerk van Christus te probeer verlei en in ‘n “gesindheid” van valse gerustheid te dompel. In die tyd van Amos het die volk Israel oenskynlik persoonlike welvaart beleef, daarom Amos se waarskuwing teen hierdie gees van valse gerustheid. Mense wat onder die broodlyn leef trap nie maklik in hierdie slagyster nie.

Willem Grobler ·

‘n Mens kan ook positief wees en werk aan planne om uit die gemors waarin jy jouself bevind uit te kom. Om die stutus quo te aanvaar en blymoedig te wees is in my beskeie opinie onnosel. Ek het ook ‘n lys gesondheidsprobleme – suikersiekte vir 53 jaar, nieroorplanting, twee beroertes en vier hartaanvalle. Maar ek is positief in die sin dat ek nié blymoedig gaan sit en wag om dood te gaan nie. Ek lewe normaal en ek baklei elke dag om normaal te wees. As ons die gemors waarin ons deur die NP en die ANC gedompel is as normaal blymoediglik moet aanvaar is ons gedoem. Ons moet nuwe planne begin maak om ons land reg te ruk.

ChrisE ·

Ek is al van naiëwiteit en volstruis mentaliteit beskuldig. Elke land het sy probleme en uitdagings. Ek het ook al fronse op die hals gehaal. Ek het al onder inbrake, diefstal, regstellende aksie, diskriminasie en plaasmoorde deurgeloop. Ek was planke toe. Ek wou daar wees, maar op ‘n goeie dag besef ek, ek is alleen daar. Almal het simpatie of empatie of wat ook al, maar ek is alleen daar. Net met die kopskuif en tel van seëninge van Bo het ek tot die besef gekom ek is op ‘n self vernietigingspad. Ek bid elke dag telkemale, tree in gesprek met ons Hemelse Vader op gereelde basis, maar niks gebeur nie. Toe kom ek agter ek moet ook vir ‘n slag luister. Ek praat Hom dood. Ek het ook ophou sinies en waansinnig krities te wees. Ek bid vir genade, seen, beskerming en wat ook al. Ek staan van my knieë af op en gaan voort met my vernietigingstog van negatiwiteit. Waarmee is ek besig? Ek stel ‘n mosie van wantroue in teen God, ons Skepper en Hemelse Vader. Hy weet nie wat ons wil hê nie. Ons smeek en pleit, maar oons kla en kerm. Ek het daarmee opgehou. Ek is genees, ek is tevrede met myself in myself en probeer die beste maak van wat ek het. Ons moet onsself eers genees van ons eie gif.

$ ·

ChrisE, baie waar woorde. Ons bid, maar vertel dadelik daarna vir almal dat niks gaan regkom nie. Mag ons leer Woord spreek oor ons lewens, want daar is soveel krag in die Woord van God.
Mag die Here vir jou goed wees en heling bring vir jou liggaam en jou siel.

Alida ·

Herman baie dankie. Jy inspireer mense met jou insiggewendheid. Sterkte vir jou.

CHAPPIES ·

BAIE DANKIE Herman,puik artikel!
Ten spyte van…ONgeag wátookal… kies jý die LEWE en possitiewe denke!
WENNER artikel!
Ás sovéél negatief-denkendes DÍT tog nét WOU vat en WOU glo!
Dis nié…WÁT…met ñ mens gebeur, in dié lewe nie…maar HÓÉ óns,dit hanteer

Seënwense,vir jou én vir álle POSSITIEWE “op die water loop” mense!

Jerry ·

Ek se nog die heeltyd dat ons n goeie gesindheid moet openbaar en versoenend moet optree in ons benadering tot die lewe. Ek kon maar net sowel met die muur gepraat het, want nie eers die see kan my skoonwas van al die beledigings en beskuldigings wat al hieroor na my kant toe gegooi is. Dankie dat jy uiteindelik by die goeie gesindheidklub aansluit en sterkte met die herstel van jou gesondheid. Aan Dries wil ek net se dat wanneer jy soos daardie 150 nie eers n keuse gehad het om te vlug nie, dan baklei jy tot die dood toe al is jy een teen 5 000. Wanneer jy egter keuses het “then you live to fight another day”! Hoekom emigreer mense, hoekom bly hulle nie en veg saam met jou 150 nie? Want hulle het n keuse, n keuse wat jou 150 nie het nie! Wie se gesindheid is die beste? die wat emigreer en dit is verstaanbaar, want daar is hoop vir n toekoms vir ons nageslagte!

Eunice ·

Tyd dat SA terugkeer na God!
Hom weer vrees,Sy Woord respekteer en ophou om ñ eie ‘god’ te wil wees, wat alewig,teenoorgestelde negatiewe stellings as Sý Woord te WÍL maak!
JAAAA…dinge loop nie glad nie,jaaa dis n uitdaging om possitief te bly, maar dis n OPDRAG…MOENIE VREES nie, 364 keer in die bybel…
Dit hang af,óf mens dit gaan VAT en joune maak…
en óf jý gaan ‘slimjan’ speel en vasvrees in satan se leuens

J ·

‘n Positiewe houding los nie noodwendig jou probleme op nie maar dit sal genoeg mense die harnas injaag, wat dit als die moeite werd maak.

John ·

… daai vers 23 wat so dof raak, is dalk grootliks die sakie wat die kersie op die koek laat sukkel en wil-wil blus, maar Herman is reg, ooreenkomstig Psalm 23 en vele ander tekste in die Bybel met beloftes wat ewig staan. Nou wil die wèreld weer neig na ‘n resessie. Die VSA en Sjina grom vir mekaar en die BRICS se sement begin loskom tussen Sjina en Indiè oor Kashmir. Herman mag niks hieroor skryf nie. Onthou!

Maggie ·

Herman, Baie dankie vir hierdie stukkie positiwiteit. Het dit self nodig gehad vandag. ‘n tik op my vingers. Sterkte vir jou en jou gesondheid.

Erna van Biljon ·

Aan ChrisE: ware woorde. Aan J: sonder ‘n sin vir humor kan geen mens blymoedig wees nie. Dankie vir jou woorde. Herman, jy is ‘n man so na my hart. Moet jou nooit steur aan suurknolle se negatiewe kommentaar nie. Doen wat jy doen en hou vas aan God.

Andries ·

Dankie vir goeie artikel. Ek vra altyd myself af: Wat is reg en positief in die wêreld wat ek ervaar? Dit wat reg is is altyd meer as die verkeerde en negatiewe en ek rig my gedagtes op dit wat reg en postief is al is daar ander dinge wat nie so lekker is nie.
Dit is die klein dinge in die lewe wat dit die moeite werd maak bv my vrou se glimlag en om met die hond te gaan stap. Dan herinner ek myself ook aan Psalm 39:8 NLV Here, waarop kan ek dan hoop? U is my enigste hoop.Psalm 62:5-7 Good News Translation (GNT) en ook Psalm 62:5-7 Good News Translation (GNT) 5 I depend on God alone; I put my hope in him. 6 He alone protects and saves me; he is my defender, and I shall never be defeated. Ek het geleer om glad nie my vertroue in mense te stel nie soos bv die “wonderwerker” Ramaphosa met sy kamstige nuwe daeraad nie. Ek probeer help in my gemeenskap waar ek kan, veral mense wat nie hulself kan help nie – dit maak die lewe vir my sinvol en positief.

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.