Nuuskommentaar: Ramaphosa by AB-eeufees – gaan die Afrikaner homself weggooi?

Pres. Cyril Ramaphosa. Foto: Jairus Mmutle, GCIS

Gaan die deur tussen die Afrikaner en pres. Cyril Ramaphosa, wat hy luidens ’n mediaberig na die Afrikaner se harte oopgeskop het, kan oop bly? Of gaan ’n skeptiese groep Afrikaners sake verongeluk?

Beriggewing oor Ramaphosa se toespraak by ’n vergadering van die Afrikanerbond se hoofraad in die Paarl om dié organisasie se eeufees te vier, het wye nuusdekking gekry. Volgens Netwerk 24 het die AB self gesê Ramaphosa het die deur na Afrikanerharte oopgeskop. Dele van sy toespraak was in Afrikaans.

Lesersreaksies was, soos die afgelope paar dae, egter oor die algemeen negatief, nie soseer oor wat Ramaphosa sou sê nie, maar teenoor die AB self. Maroela Media het in gister se nuuskommentaar hierdie kwessie ook aangeraak.

Feit bly dat die AB hom tot voortgesette dialoog verbind het. Ramaphosa het op sy beurt aangedui: hoe meer sienings oor grondhervorming, hoe beter. Hy kon egter nie die gat in die emmer regdokter nie, en die kwessie van onteiening sonder vergoeding hou steeds die gevaar in dat alle goeie bedoelings oor grondhervorming kan verongeluk.

Die getalle lesersreaksies is normaalweg nie ’n goeie maatstaf om die omvang van verset te bepaal nie. ’n Meer genuanseerde studie, soos die identifisering van die standpunte van gereelde deelnemers, die gehalte en ingeligtheid van dié lesers en gebalanseerdheid help egter om tendense te identifiseer.

Die AB sal egter rede hê om bekommerd te wees oor die omvang van vyandige onkunde, ondanks omvangryke pogings om sy beeld wat dit oor dekades opgedoen het, te verbeter. Net so kommerwekkend is dat ander, oningeligte lesers bereid is om die skewe voorstellings vir soetkoek op te vreet. Aanhangers van samesweringsteorieë is ook erg bedrywig op hul rekenaars se toetsborde.

Is die omvang van vyandigheid en skeptisisme van so ’n aard en omvang dat dit realisties sal wees vir die president en sy ondersteuningsdienste om af te lei dat die meerderheid Afrikaners die president se hand van vriendskap weggeklap het? Hierdie ondersteuningsdienste is veel beter toegerus as die “gewone” ontleder om betroubare afleidings te kan maak.

Hoe wys is dit van heethoof-Afrikaners om organisasies uit eie geledere swart te smeer en verdag te maak, terwyl daar soveel te wen is uit onderlinge vertroue?

Dit is natuurlik nie die volledige prentjie nie. Kom dit by grondonteiening, was die AB van die begin af ’n belangrike lid van die ad hoc-komitee vir grondbesit, en sal dit onrealisties wees om te verwag dat die AB sommer ’n kat in die sak hieroor verkoop sal word. En dié ferm standpunte dateer van die dae voor onteiening sonder vergoeding ANC-beleid geword het.

Uit ’n bydrae vir die Februarie 2018-nuusbrief van die AB deur die voorsitter, Jaco Schoeman, kan reeds veel afgelei word oor hoe die AB sake met Ramaphosa gaan hanteer.

Die stigtingsdoelwitte van die AB word ook in die nuusbrief hanteer, en lui soos volg:

1. Die aaneensmelting van Afrikaners; Afrikaners oor die lengte en breedte van ons land, die verlang na die opheffing van ons volk, te laat saamwerk om die verskil van opinie oor volksvraagstukke uit die weg te ruim, en ʼn gesonde en vooruitstrewende eensgesindheid te bewerkstellig.
2. Die ontwikkeling van ʼn egte, ruimhartige demokratiese volkslewe, en die opleiding van die Afrikaner tot die regte gebruik daarvan.
3. Die opwekking van die selfbewussyn van die Afrikaner, en die inboeseming van liefde vir sy taal, geskiedenis, tradisies, land, volk en godsdiens.
4. Die bevordering van oorspronklike Suid-Afrikaanse kuns en kultuur in alle opsigte.
5. Die veredeling van die samelewing op grondslag van die skoon ou sedes en karaktertrekke van ons volk.
6. Die behartiging van die ekonomiese belange van Afrikaners.
7. Die handhawing van die beginsels van Jesus Christus.

Vandag word dit as ’n goeie ding beskou dat daar organisasies is wat die Afrikanerdiversiteit in styl en oortuigings verteenwoordig. Een persoon sal dalk gemakliker in die AB ’n kulturele tuiste vind, ’n ander by AfriForum. Wat egter werklik hartseer is, is die skerp nydigheid wat uit Afrikanergeledere teenoor Afrikanerorganisasies ontstaan, soos die onlangse vuurwerk om AfriForum se kop.

Hierteenoor kan uiteenlopende organisasies soos die ad hoc-komitee oor eiendomsbesit, (volledige naam Tussentydse (ad hoc) Komitee vir die Beskerming van Eiendomsreg), bestaande uit AfriForum, die Afrikanerbond, die FW de Klerk Stigting, die Afrikanerfront, Agri SA, die ACDP, die DA, die FAK, die LWO, die NBU (Nasionale Belastingbetalersunie), Solidariteit Instituut vir Grondwetlike en Arbeidsregtelike Aangeleenthede, TLU SA, die VF+ en VRA (Vereniging van Regslui vir Afrikaans) weer goed saamwerk. As dit maar die norm kon wees.