Nuuskommentaar: Ramaphosa – prins van los drade?

Pres. Cyril Ramaphosa. Foto: Siyabulela Duda/GCIS

Met Sondagaand se Kommentaar op RSG het dit by tye geklink soos ’n lys van goed in Suid-Afrika wat verkeerd loop. Die program is egter nie al wat dié indruk geskep het nie. Enige persoon wat die nuus volg sal moeilik tot ’n ander gevolgtrekking kom.

Breed in die pad van hierdie waarneming is die glimlaggende gesig van pres. Cyril Ramaphosa – ligjare verwyder by sommige mense van die Rama-ekstase ná sy verkiesing einde verlede jaar.

Toe egter reeds is daar deur meningsvormers op Maroela Media daarop gewys dat daar ’n yslike probleem in die pad beland het. Heelwat steun onder die breë publiek vir Ramaphosa is gegenereer uit weerstand teen sy vernaamste teenstander, dr. Nkosazana Dlamini-Zuma, se steun vir grondonteiening sonder vergoeding. Nié dat Ramaphosa veel van ’n keuse gehad het nie – die ANC het by die einste kongres sy beleid gewysig om ook hiervoor voorsiening te maak. Ramaphosa het dadelik skadebeheer probeer toepas deur streng voorbehoude te plaas wat die toepassing van die beleid op die oog af byna onmoontlik sou maak.

Die uwe het egter gemaan dat groot moeilikheid op hande is. Die liedjie, “There is a hole in the bucket, dear Lisa”, is gebruik.

Word na koerantopskrifte gekyk, het die probleem inderdaad geëskaleer. Op die oomblik is daar groot ontsteltenis nadat AfriForum ’n lys van plase bekend gemaak het wat die regering glo vir onteiening sonder vergoeding geoormerk het.

Onmiddellik was daar verhale van trauma, soos dié van die boer wat ʼn plaas pas aangekoop het. Die regsproses moet wel nie vooruit geloop word nie, maar die indruk word al hoe duideliker geskep dat die ANC nie lus is vir die hele regsproses om sy verloop te neem nie. AfriForum word weer vir die bekendmaking van die lys verkwalik omdat dit tot besetting kan lei in ’n land waar die polisie nie werklik oor die kapasiteit beskik om dit te keer nie – juis een van die los drade wat opduik.

Met een klap het Ramaphosa die ekonomie onder druk, en dalk veral onder buitelandse druk, geplaas. Dalk ernstiger het hy raspolarisasie in ’n slingergang geplaas. Ekonome krap nog kop oor hoekom die rand weer so erg geduik het, en is nie seker hoe ’n groot invloed die grondkwessie daarop het nie. Selfs sonder die grondkwessie word dit egter ook tot die lysie van los drade toegevoeg.

INCE/Connect Community News stel dit vanoggend só: “Of course, if we had sounder policies of our own, the rand wouldn’t be as vulnerable as it is.”

Die lys los drade waarmee Ramaphosa nou te make het, in weerwil van positiewe stappe en tekens soos verdwaalde eilande in ’n woeste see, neig om die vraag te laat ontkiem of Ramaphosa ’n wenner of verloorder is. Die Belgiese politikus en leier van die Groenes, Meyrem Almaci, het pas in ’n onderhoud gesê: “De mens is 99 procent van zijn leven een loser.” (Die mens is 99% van sy lewe ’n verloorder).

Dit lyk juis op die oomblik of die lys los drade by die dag langer word – munisipale dienslewering wat vou, semi-staatsinstellings wat nie hul voetwerk reg kry nie, lompheid om die kol-kol-effek van die droogte doeltreffend te takel, riviere wat by die dag meer besoedel raak soos rioolplase witpens bo begin dryf, endemiese korrupsie en vele meer.

So pessimisties soos Almaci durf ’n mens nie te wees nie, veral nie met Ramaphosa wat ’n minstens deels bewese rekord het dat hy knap kan wees. Hoe goed hy los drade weer bymekaar kan trek en op die regte plekke gekoppel kan kry, moet egter nog duidelik word. In sy termyne as adjunk-president het hy ongelukkig nie genoeg die kaarte van sy werklike kwaliteite gespeel nie, en baie van die probleme wat hy nou mee sit, is regstreekse Zuma-maaksels toe Ramaphosa skynbaar passief stilgestaan het. Hoeveel ruimte adjunk-president Mabuza hom gaan laat is ook nog onduidelik, veral in die aantog na ’n algemene verkiesing.

’n Innemende glimlag en mooi woorde (waarvan skynbaar dadels kom) is nie nou die aangewese weg nie. Om die regte ding te doen verg fyn voetwerk tussen faksies van die ANC en die invloed van die EFF, asook geduld.

Maar het die land die nodige tyd hiervoor?

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

28 Kommentare

jongste oudste gewildste
John

… deels bewese rekord… AfriForum nog ‘n lys asseblief van al CR se goeie dade en gee sommer dadelik die lys asb nie weer soos Sondag s’n nie en alles geblok is en mense ophol was nie… dominee was self nie by die kerk nie. Diegene met min geheue op die rekenaar probeer ‘n uitdruk van ons prez se bekwaamhede en flinke aksies by buurman bekom. Die lys is lank… kry boetie om te help dra.

Jannie

Mense wat weet, kan vir jou sé dat Ramaphosa hierdie Kommunistiese grondgryp- program reeds in 1993 beplan het!!! Sy verkiesing tot President is deur die NWO se program so gekoördineer dat dit net op die aangewese tydstip geskied het!!!

Willie

Ek dink regtig CR is sy diepte uit! Hy is nie net nie, hy het die plot verloor…

Ramapaddapot

Ramaposa word deur die EFF gelei.

Die grondonteiening debakel gaan oor stemme werf en die plase wat SOVER gekenmerk is het dalk ontginningsregte wat dalk deur Ramapaddapot en kie gestroop kan word – en veral vir die Sjineese ook so ‘n ietsie gee. Hulle help S A dan so baie?

Ek het geen respek vir Ramapaddapot en sy korrupte maatjies nie – hulle is nog nie klaar met die stropery van S A nie.

Dries

Di kernprobleem is dar CR di volgende verkiesing “goed moet wen” – anders is hy geskiedenis! Hiernaas kan “almal” grond kry maar sonder “gesonde water” kan geen mens, dier of plant leef ni. Dit word beraam dat 0.8 – 1 R Triljoen nodig is, om ons rioolplase en drinkwater, weer op standaard te kry. Voeg by dinge soos SBE skuld, di nuwe voorgestelde Gesondheidplan en jy moet van ‘n ander planeet wees, om ni te sien dat SA net verder in ‘n moeras van skuld gaan wegsak ni. Jan en San wag ook steeds angstig om di stappe te verneem… Lees meer »