Nuuskommentaar: Word ras al weer al belangriker?

Grafika: Twitter

Grafika: Twitter

Of ʼn mens nou dink dis reg of verkeerd, is daar wêreldwyd toenemend tekens van ʼn “herlewing” van rasbewustheid en in sommige lande word selfs institusionele maatreëls hiervolgens getref. Ons is egter nog ver van ʼn gevolgtrekkingsvlak en besprekings hieroor behoort baie versigtig en met inagneming van ander se gevoelens gevoer word.

Dis nie ʼn vraag of dit reg of verkeerd is nie. Dis ook nie ʼn vraag of ʼn mens dit wil hê of nie. Dit lyk asof ras as norm weer wêreldwyd aanklank vind en dié rasbewustheid kom ook nie net van een kant af nie. Die vraag is ook relevant op die vooraand van Erfenisdag môre.

Gister het die burgemeester van die Amerikaanse stad, Charlotte in Noord-Carolina, ʼn aandklokreël ingestel, nadat ʼn noodtoestand wat vooraf afgekondig is, nie die gewenste uitwerking gehad het nie.

Die onluste, met ʼn oorweldigende rasse-ondertoon, volg nadat ʼn swart man deur ʼn polisiebeampte doodgeskiet is.

Dis niks nuuts nie. Die VSA is die afgelope aantal jare gereeld geruk deur onluste nadat gewoonlik ongewapende swart mans deur wit polisiemanne geskiet is. Daar is al omvattende ondersoeke gedoen.

En tog gebeur dit weer en weer.

In die proses is ʼn beweging gestig met die naam #BlackLivesMatter. As ʼn soort teenvoeter vir hierdie uitdrukking volgens ras, is ʼn beweging gestig, #AllLivesMatter.

Intussen is daar op ʼn laer vlak onluste by universiteite, ook met raskwessies as grondslag. Dit het groot ooreenkomste met wat hier gebeur. Wanneer ʼn “ander soort” by ʼn bepaalde instelling ʼn sekere kritiese massa bereik, lyk dit of daardie groep nie meer bereid is om by die heersende kultuur in te pas nie en hul eie ding op hul manier wil doen. Word hierdie groep nog groter, is dit ʼn geval van reg of weg met die groep wat voorheen die toon aangegee het.

Dit boemerang op ander vlakke, soos die jongste meningspeilings, wat toon dat Donald Trump nou sy voorsprong bo Hillary Clinton om die presidentskap, tot vyf persent vergroot het. (Ander peilings mag ander syfers hê).

Op 19 September, berig ʼn nuusblad van San Francisco, dat die San Francisco State University die jongste instelling is wat Afro-tema vloere in koshuise aan swart studente bied. (ʼn Mens kan jou die gevolg indink as ʼn universiteit hier “wit-tema”-vloere in koshuise sou instel).

Volgens ʼn peiling is 84 % van Amerikaners, die meeste swart mense inkluis, gekant teen hierdie reëling en bekommerd dit kan tot ʼn herstel van segregasie in die VSA lei.

Maroela het reeds op 12 September ʼn artikel in die Christian Science Monitor oor die moontlike desegregasie van die VSA onder die loep geneem.

Plaaslik slaan die rasbewustheid ook in talle opsigte hard uit. Verskeie swart leiers en instellings het byvoorbeeld hul sterk voorkeur vir ʼn swart kandidaat vir Kovsies se rektorspos uitgespreek. Die ander twee finaliste is bruin (waarskynlik die sterkste kandidaat) en ʼn wit vrou van Argentynse afkoms.

In hul uitsprake laat hierdie groepe en individue geen ruimte vir misverstand dat hul steun daaroor gaan dat die man swart is nie. (In die proses word taamlike vieslike verwyte na oud-rektor Jonathan Jansen geslinger, dat hy in wese nie genoeg anti-wit was nie).

Kortom, voorbeelde vanoor die hele wêreld kan gelys word. Daar is byvoorbeeld ʼn horde stukke op die internet oor beweerde rassisme in Nieu-Seelandse rugby.

Word die woordeboeke, die grondwet en die internasionale reg nadergetrek, maak ras nie ʼn norm of aspek uit van die term volk nie. Ras, as norm vir selfregering, is pertinent uitgesluit in artikel 235 van die grondwet en so ook die internasionale reg. Die naam van die skynbaar abortiewe Kommissie vir die Beskerming en die Bevordering van die Regte van Taal-, Godsdiens- en Kultuurgemeenskappe, sluit ook ras uit by die identifikasie van gemeenskappe wat vir minderheidsregte (waaronder selfbeskikking) kwalifiseer.

(Ja, as mens diep genoeg in veral Nederlandse literatuur gaan krap, gaan ʼn mens nog definisies kry wat ras insluit).

Tydens die Kodesa-onderhandelings het diegene wat vir selfbeskikking en selfbestuur onderhandel het, versigtig weggebly van die ras-norm en ook later met die voorstelle van die Volkstaatraad.

Die feit was egter dat die ANC behoorlik ras op die brein het en enige verwysing van groepselfstandigheid as ʼn rasgedrewe ding of uitkoms vertolk. Dit was onder andere duidelik in ʼn onderhoud tussen Beeld en Gwede Mantashe, sekretaris-generaal van die ANC.

Was die tydperk van 50 jaar sedert die VSA segregasie afgeskaf het en sedert Australië sy beleid van White Australia laat vaar het, te min vir ʼn nie-rassige denkwyse om by lippediens verby in te sink? Of is die konsep net nooit behoorlik aan almal verkwansel nie, onder meer ook nie aan swart groepe nie, wat juis met ʼn herlewing van swart trots te make het?

Dis nog te vroeg om finale oordele te fel.

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Nuuskommentaar, Rubrieke

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

30 Kommentare

Jakkalas ·

Ek is al so moeg vir die ras issue. Die ANC het dit as sy verkiesing veldtog tema gebruik en wat het dit hulle in die sak gebring??? Daar gaan altyd rasisme wees want mense is anders geskape. Kom daaroor en beweeg aan. Moenie vashaak op een plek nie. Meer belangrike dinge verg nou aandag.

Loslip ·

Of jy nou moeg vir die ras iesjoe is, of te not.
Dit is ‘n olifant wat nog baie lank in die kamer gaan rondstrompel.

Sum ·

Onkunde is erger as ‘n oorlog, want dit veroorsaak 10x meeroorloe…
Eerstens die snert wat die verwarde ras gedrewe onkundige kwytraak hierbo is absoluut skreiend. Swart polisie manne skiet swart bende lede, plunderaars, kriminele en wettelose sg burgers en die media blameer die wit polisie OM rasse haat en geweld aan te wakker. As die skrywer enigsins die waarheid wou skryf sou hy huiswerk gedoen het en tot die openbaring gekom het dat meer as 70% vanm die plunderaars en bende lede aangery word EN betaal word om te plunder en geweldadig te betoog. Al die gebuere is georgistreer om rasse haat en burger oorlog te aktiveer. Ai

Protes ·

Ek is so moeg vir die alewige politiese korrektheid selfs die media gee nie die feite soos dit is nie tensy dit ‘n wit persoon is dan word die ras op die hoofopskrif geplaas gee die feite soos dit is as ‘n Chinees ‘n winkel beroof het se dat dit ‘n Chinees was en so ook as die skuldiges swart ,wit was.

andrea van vuren ·

Dit verstom my hoe pateties die rektore en visie-rektore is tydens die studente onluste. Adam Habib sit in New York terwyl Wits brand, de Villiers handhaaf ‘n lae profiel, de la Rey sluit sommer die hekke. Tog soo bang vir die rasding! Watter ordentlike, kutuurbewuste person sal ‘n historiese gebou afbrand en geskiedkundige boeke in vlamme laat opgaan? Nou vra ek weer, waarheen nou Suid-Afrika?

Koos ·

Ek stem saam die huidige onluste by die universiteite is nie die studente nie die meerderheid is swart studente gee die feite soos dit is

Kobus ·

Weereens ‘n nugtere beredeneerde artikel. Bygesê, sekere van ons Afrikaanse aanlyn ‘koerante’ is egter oorsensitief vir die realiteit, nie omdat ‘n persoon van ‘n sekere ras as sodanig tipeer word nie, maar bv omdat die ANC, van die betogende studente en hul leiers, of sekere mense soos Max en andere wat al gesê het witmense moet stilbly, die raskaart speel, as mens daarop reageer, al is dit op beskaafde wyse, is die Afrikaanse aanlyn ‘koerante’ oorsensitief vir die werklinheid. (Blykbaar nie as die rubriekskrywers daaroor skryf en sekere voorbeelde ophaal nie.)

Uvonka ·

Hi daar Grap, die opskrif is “Word ras al weer belangriker”, dit is erg vervelig omdat alles daarop blameer word en as verskoning gebruik word.

Theuns ·

More Herman. Ek wil nou nie slapende honde wakkermaak nie maar as die rede vir selfbeskiking (Ras) uitgesluit word deur die Grondwet se Artikel 235, kan daar mos nooit ‘n Volkstaat vir Afrikaners of Witmense verkry word nie? Maw al sou al die mense wit wees in die staat sal dit nog nie werk nie? Dit is as jy eng kyk soos die ANC altegraag doen en ras defineer as of wit of swart? Dit sal nie saak maak of al daardie mense van verskillende volke kom nie,bv. Jode, Franse, Engelse, Afrikaners ens? Sit jy Swart rasse in die mengsel(mix) in soos byvoorbeeld Kleurlinge is dit mos nie meer n volkstaat nie? Nou is die vraag hoe kry Orania dit reg om redelik onafhanklik op grond te bly wat enige tyd deur die Regering ontein kan word as dit hule pas? Vergewe my as ek vir jou se dat my gevoel is dat ons behoorlik “gesnooker” is in 1994!

JC ·

Theuns, jy meen hulle gaan sommer net vir Orania onteien hehehe! Dit is Afrikaners se grond /eiendom daardie !! Niemand vat daaraan nie! Wie’s gesnoeker, nie Afrikaanses nie, in my opinie? Ons leef ons taal en kultuur uit, en ons veg daarvoor, wat wonderlik en kraakvars is! Wat doen ander kulture/rasse om te veg vir hul kultuur?NIKS!ZILCH!!
Eintlik moet ons dankie se vir die geleentheid!

Herman Toerien ·

Hallo Theuns. Dink bietjie terug aan die DA-jeug se optog na Kleinfontein waar die voorbok iets tot dien effekte gesê het dit is uit protes omdat Kleinfontein buite die grondwet optree. Sy is toe eur die DA se ringkoppe self reggehelp. In die hele aanloop en verloop het Kleinfontein volgehou ras speel geen rol nie, net Afrikanerskap. Dit beteken nie dat daar nie ‘n rasbewustheid by baie Afrikaners (en Engelse ens) is nie, of hulle nou opge hulle is liberaal, gematigd, of wat ook al. Ek dink aan ‘n advertensie uit my kleintyd in ‘n Duitse tydskrif. ‘n Swart man hou ‘n dop vol skop vas en sê: “Ich trinke Jagermeister weil Ich eine echte Deutsche willen.”

Theuns ·

Dankie Herman vir jou antwoord.Ek sal maar Jagermeister ook drink wyl ek ook probeer om ‘n goeie Afrikaner te wees. Maar dit is nou in my DNA om nie die ANC te vertrou nie. Hoe se ons Engelse langenote ” once bitten twice shy” Groetnis en lekker naweek!

Frans C ·

Wanneer gaan die besef nou deurdring dat dit nie ‘n skande is om wit of swart of geel te wees nie.Dit moet tog uit die Bybel en die ontwikkeling van die mens duidelik wees dat soos mense oor die aarde versprei het groepe apart of sê maar rasse ,afsonderlik ontwikkel het omdat hul deur die eeue heen eienskappe ontwikkel het wat die beste by die natuur en omgewing waarin hul hulself bevind het, aangepas het. Natuurlike Apartheid of selfstandige ontwikkeling.

Dit moet tog duidelik wees dat soos mensegroepe Afrika verlaat het en in aanraking gekom het met vroeë groepe mense wat Afrika verlaat het, anders gelyk het as die vroeë
trekkers wat die Neanderdal mens insluit. Daar is duidelike bewyse dat mense noord van die Sahara selfs ‘n bietjie van die DNS van die Neanderdal in sy DNS het en dat dit nie by mense suid van die Sahara aangetref word.

As elkeen ‘n bietjie trots en respek vir sy eie ras met sy afsonderlike ontwikkelingsgeskiedenis ,taal en kultuur het, sonder om sigself op grond daarvan bo ander te verhef ( en dit is rassisme) ontwikkel sal hierdie gesprek nie nodig wees nie.

andrea van vuren ·

Pasop Frans, een van die dae gaan ons ge’Sparrow’ word as ons die woord ‘DNS’ in gemengde geselsskap genruik!

Heleen ·

Ek sou graag in vrede met almal wou saamleef maar wat my WOEDEND maak is dat daar gesê word dat daar nie iets soos swart op wit rassisme bestaan nie.

Jean ·

Ja lyk my RAS en etnisiteit in Europa en in Amerika raak nou groot, mos al die jare SA uitgekryt as die muishond van apartheid, hulle doen dieselfde, hulle gee dit net nie ‘n naam nie .. die probleem is net dat daar steeds meer verdraagsaam van die een kant af is as van die ander kant af. Jy moet of rassisme heeltemal uitwis, of jy moet albei ewe hard straf daarvoor. Help nie die een groep mag rassisties wees en die ander groep wat uit die geskiedenis as rassiste uitgemaak is, mag nou nie meer ‘n voet verkeerd sit nie.

Jakobus ·

Dan is daar meer van die een groep as van die ander in die tronk.

m ·

Ras kwessies sal altyd daar wees. Sekere mense laat ons dit nooit vergeet nie..

Maria van Dieweeck ·

President Verwoerd het veeeeer vooruit gesien en dink.

Theuns ·

Maria so ver ek weet was daar eers n President toe ons n Republiek geword het.Die eerste President was CR Swart. Ek stem saam met jou en JC dat Dr Verwoerd sy tyd ver vooruit was. En JC ek betwyfel nie dat die grond aan ORANIA behoort nie maar die grond is nog op SA Grondgebied en val nog onder die Onteinings wet as dit vir een of ander rede in die algemene belang sou wees om te ontein?!!

andrea van vuren ·

Dr. Verwoerd was ons Eerste Minister nie president nie.

ernest ·

Ras is reg..!!!! Probeer die liberalisme nou almal onder een sambreel dek..? Ons werk saam onder “een” kleur, maar in my privaat tyd assosieer ek met mense van my kultuur..!! Ek het respek vir enige ras soos vir myself, maar ek verkies om my privaat lewe tussen mense van MY ras deur te bring. So was dit van die Skepping af en so sal dit wees tot aan die “einde van dae”. Aanvaar dit as ‘n gegewe en maak vrede met julle vertwyfeling oor die dinge.

abba ·

Ras sal altyd n kwessie wees. Wereldwyd. Die Turke en Duitsers hou nie van mekaar nie. Palistina en Israel hou nie van mekaar nie. Christene en moslems hou nie van mekaar nie. Dit gebeur nou meer wereldwyd. Soort soek soort. Ek meng met net met my eie mense behalwe by die werk tussen 8 en 5.

dea ·

Europa en Amerika besef nou eers met wat se probleme ons hier sit noudat dit met hulle gebeur. Kry hulle jammer.Ons is al gekonfyt daarin. Hulle nie. Ek soek net my eie soort. Dit is natuurlik.Die bok wei nie saam met n hyiena nie. Dit is tog waar of n leeu saam met n bees? Het nog nooit gewerk nie en sal nooit nie al forseer jy dit. Forseer veroorsaak haat.

MJL ·

News24 berig dat Mnr Malema die ” Jan Braai” aksie kritiseer. Dit lyk vir my of hierdie “wit kultuur” aksie hom irriteer. Hy wil hê ons, die witmense, moet eerder die dag gebruik om te leer hoe om swartmense se name (seker vanne ook) uit te spreek. Weer is dit “julle” wat moet leer om “ons” name uit te spreek. Ek dink hy moet eerder die dag gebruik om sy mense te leer om ordentlike Engels te praat en natuurlik ook om my (ons) name uit spreek. Ek kry dikwels oproepe van swartmense wat maar sukkel om my naam en van uit te spreek. Sy arrogansie slaan duidelik deur. Hy vergeet die swaard sny twee kante toe.

Jean ·

Hy moet hulle leer dat jy niks vir niks kry nie, dat disrespek vir ander mense se eiendom en lewens afstootlik is en onbeskaafd. Leer hulle eerder dat om alles af te brand nie fooie gaan laat verlaag nie, en dat daar in enige opstand en rewolusie GEEN wenners is nie.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.