President Jacob Zuma is glo in die proses om ʼn hoof vir die spesiale ondersoekeenheid (SOE) te soek, het die presidensie Dinsdag gesê.
“Die aanstelling geniet steeds die aandag van president Zuma,” het Mac Maharaj, die presidensie se woordvoerder, gesê.
“Dit sal onvanpas wees om nou die name van die kandidate wat oorweeg word, bekend te maak. Ons wil hul privaatheid beskerm sowel as die integriteit van die proses en die instelling,” het hy gesê.
Dié eenheid wat korrupsie beveg, is al vir 14 maande lank sonder ʼn hoof nadat regter Willem Heath in 2011 bedank het. Dit was skaars twee weke nadat hy aangestel is.