Belastingbetalers se geld is glo ook aangewend om vir opknappingswerk by die huise van pres. Jacob Zuma se twee broers te betaal.
Michael en Joseph Zuma het glo voorraad van die elektrisiteitsmaatskappy Voltex by hul huise laat aflaai as deel van die “prestige projek”, berig The Sunday Times. Dié inligting is glo deur Voltex by die hooggeregshof in Durban ingedien.
Voltex het die hof genader om R545 249 te verhaal wat Pamela Mfeka, boukontrakteur, hulle glo skuld. Die departement van openbare werke het glo ‘n kontrak van R47,6 miljoen aan Mfeka toegeken om ses geboue in Nkandla op te rig.
Luidens die berig stipuleer die hofdokumente dat Mfeka agterstallig geraak het met die betaling vir elektriese kabels en ander goedere wat aan Zuma se huis en sy broers se huise verskaf is.
Michael ontken dat enige werk aan sy eie of Joseph se huise gedoen is. “Daar is nie ‘n projek hier nie,” het hy aan die koerant gesê.
-SAPA
En so sal die een na die ander bedrogspul oopgevlek word sonder dat die bedrieërs vervolg word. Wanneer gaan iemand in ‘n gesags-posisie sy/haar rug styf maak om hierdie stropery van die Staatskas stop te sit???