Obama se besoek aan SA dalk van baan – AFP

President Barack Obama

Pres. Barack Obama se beplande besoek aan Suid-Afrika kan in die gedrang kom, sou oud-pres. Nelson Mandela nou te sterwe kom, berig Stephen Collinson van AFP, wat oor die president se besoek aan Afrika verslag doen.

Obama het Woensdagaand in Senegal aangekom, en sal Donderdag per veerboot ‘n besoek aan Goree-eiland bring waarvandaan talle slawe uit Senegal na die Nuwe Wêreld verskeep is. Obama se vrou, Michelle, is ‘n nasaat van eertydse slawe.

Collinson skryf Obama se ondersteuningspersoneel kan dalk gedwing word om die bepanning vir die besoek aan Suid-Afrika op te skeur, sou Mandela sterf. Hy berig dat Mandela se familie bevestig het dat Madiba nou op lewensondersteuningsapparaat is.

Obama is geskeduleer om Vrydag in Suid-Afrika aan te kom, maar ‘n besoek aan Mandela, wat hy as sy held beskryf het, is nie op die agenda nie. Mandela en Obama het mekaar in 2005 ontmoet toe Obama pas tot senator verkies is. Hulle was daarna verskeie kere telefonies in verbinding.