Batteson-Kritzinger en haar skoonma Alna Kritzinger is Saterdagmiddag oorlede nadat die bakkie waarin hulle gery omgeslaan het toe dit teen ʼn ander voertuig gebots het naby Theunissen in die Vrystaat. Batteson-Kritzinger se man, Jake, en haar skoonpa was ook in die bakkie en is ernstig beseer. Hulle bakkie het teen ʼn Toyota Tazz gebots. Die bestuurder van die Toyota Tazz het glo in die verkeerde baan gery nadat hy ʼn ander motor verbygesteek het. Die bestuurder van die Tazz het gevlug na die ongeluk en die motor is later verlate in ʼn township gevind. Luit. Ian Gaobepe, woordvoerder van die polisie, het aan Maroela Media bevestig dat die 35-jarige bestuurder van die Tazz hom Sondagoggend aan die polisie oorgegee het. Gaobepe sê die man sal Maandag in die Theunissen-landdroshof verskyn op aanklagte van strafbare manslag, vlug van die ongelukstoneel en bestuur sonder ʼn lisensie.
Batteson-Kritzinger en haar man Jake is volgens hul Facebook-profiele op 28 April verlede jaar getroud. Batteson-Kritzinger het onder meer op Saterdae die “Weekend Warm-up”-program aangebied.
Lees ook:
Radio-omroeper sterf in ongeluk