Argieffoto. Foto: Netcare 911
Sewe mense is Sondag dood en nege het ernstige beserings opgedoen nadat hul voertuig op die N1-snelweg naby Modimolle in Limpopo in ʼn botsing betrokke was.
Santi Steinmann, ʼn woordvoerder van Netcare911, het gesê ʼn voertuig en ʼn minibustaxi was in die ongeluk betrokke. “Sewe mense is op slag dood, twee het kritieke beserings opgedoen en sewe het ernstige beserings opgedoen,” het Steinmann gesê.
Die beseerde mense is op die toneel gestabiliseer en met ʼn ambulans na nabygeleë hospitale geneem vir verdere mediese behandeling.
Dit is in dié stadium nog nie bekend wat die ongeluk veroorsaak het nie. Die polisie ondersoek die voorval.
