ʼn Tweejarige seuntjie van Durban, wat ontvoer is toe sy pa se bakkie gekaap is, is by ʼn manskoshuis in KwaMashu in KwaZulu-Natal opgespoor.
“Alhoewel ons redelik seker is dat dit Emmanuel Khoza is, moet sy ouers nog eers ʼn formele uitkenning doen voordat ons die soektog kan aflas,” het kol. Jay Naicker, woordvoerder van die polisie, in ʼn verklaring gesê.
Die seuntjie is deur ʼn lid van die publiek opgespoor en na die polisiestasie gebring. “Speurders is nou by die seuntjie en gee hom iets om te eet voordat hy na sy ouers geneem sal word,” het Naicker gesê.
Khoza se pa het Donderdagaand saam met sy vrou, pasgebore baba en die tweejarige Emmanuel in hul bakkie deur Cato Manor in Durban gery toe hy afgetrek het om ʼn vriend te groet.
Drie mans het oomblikke later in die bakkie gespring en met sy vrou en die twee kinders weggejaag. Emmanuel se ma kon met die baba uitspring, maar die kapers het met hom weggery.
Laat asseblief weet of dit toe Emmanuel is.