ʼn Fietsryer is Donderdag in die hospitaal dood verklaar nadat hy in Democracyweg in Milnerton aangetref is.
“ER-paramedici het omstreeks 07:25 op die oproep reageer en die fietsryer langs die kant van die pad aangetref,” het Russell Meiring, woordvoerder van ER24, in ʼn verklaring gesê. “Hy het geen tekens van lewe getoon nie.”
Meiring sê paramedici het dadelik noodbehandeling op die pasiënt toegepas en hy is na Somerset-hospitaal geneem, waar hy later dood verklaar is.
Die oorsaak van die man se afsterwe is onbekend en die voorval word ondersoek.