Opknappingswerk aan Zuma se woning kos R170 miljoen

Opknappingswerk aan president Jacob Zuma se amptelike woning in Pretoria sal die belastingbetaler na verwagting sowat R170 miljoen uit die sak jaag.

Die Star berig dat Zuma se woning ook ʼn sauna en ʼn stoomkamer sal kry as deel van die opknappings. Daar word ook opknappings gedoen by Zuma se kantore en die Bryntirion-landgoed in Pretoria waar ministers woon. Die totale koste is glo nagenoeg R400 miljoen. Die inligting het Woensdag aan die lig gekom tydens ʼn parlementêre vraag van die DA aan die minister van openbare werke, Gwen Mahlangu-Nkabinde. Die DA se parlementêre leier het uitgevaar teen Zuma en het onder meer gesê dat dit verregaande is dat miljoene rande op opknappingswerk spandeer word terwyl nagenoeg 7 000 huise met die geld gebou kon word.