ʼn Vierjarige seun is dood en sy 12-jarige broer het brandwonde opgedoen nadat hulle pa homself en hulle vol petrol gegooi en aan die brand gesteek het.
ʼn Polisiewoordvoerder, brig. Thulani Ngubane, sê die 40-jarige pa wou glo homself en die kinders doodmaak toe hy hulle Saterdagaand omstreeks 22:00 aan die brand gesteek het. Die vierjarige seun het onderweg na die hospitaal aan sy wonde beswyk. Die 12-jarige seun en die pa het brandwonde opgedoen. Die kinders se ma was nie tuis nie. Die gesin se huis is in die brand vernietig. Die pa word onder polisiebewaking in die hospitaal behandel en sal aangekla word van moord en poging tot moord. Die pa en oudste seun is in ʼn stabiele toestand. Die polisie ondersoek die saak.