Cecil Chao het in 2012 wêreldwyd opslae gemaak toe hy 500 miljoen Hongkong-dollar ($65 miljoen of sowat R700 miljoen) aangebied het die vir die man wat daarin kan slaag om sy dogter by haar lewensmaat af te rokkel. Volgens ʼn dagblad van Maleisië het Chao sy aanbod nou na $130 miljoen verdubbel. Gigi Chao het intussen ʼn ope-brief aan haar pa geskryf wat Woensdag in twee koerante in Hongkong gepubliseer is. “Ek weet dis moeilik om te verstaan, wat nog te sê dit te aanvaar,” het Gigi geskryf na aanleiding van haar aangetrokkenheid tot vroue. Gigi se pa het die aanbod gemaak nadat hy te hore gekom het dat sy en haar lewensmaat, Sean Eav, in die geim in Frankryk gaan trou het. Hongkong het homoseksualiteit in 1991 gedekriminaliseer maar huwelike tussen mense van dieselfde geslag word steeds nie erken nie. Gigi sê dit sal vir haar die wêreld beteken indien haar pa net nie so bang is vir haar lewensmaat nie en haar as ʼn normale en waardige mens behandel. “Ek sal jou altyd vergewe vir die manier wat jy dink aangesien ek weet dat jy dink jy tree in my beste belang op.”
Die akteur Sacha Baron Cohen werk glo intussen aan ʼn rolprent oor die sakemagnaat se aanbod. Chao het sy fortuin deur eiendomsontwikkeling bymekaar gemaak. Hy het ʼn reputasie as ʼn rokjagter en sy voorliefde vir Rolls Royce-motors. Hy het een keer beweer dat hy 10 000 meisies het maar nooit getroud is nie. Gigi is een van sy drie kinders by drie verskillende vroue.
Gelukkig. Liefde is nie te koop nie.