Suid-Afrika het gister sy medalje-oes tot 15 opgestoot by die Paralimpiese Spele in Londen.
Natalie du Toit het haar tweede goue medalje tydens vanjaar se spele ingepalm nadat sy die 400m-vryslag in ʼn tyd van 4:30.18 gewen het. Emily Gray het sewende geëindig met ʼn tyd van 4:59.77.
Shireen Sapiro het ʼn brons medalje verower in die 100m-rugslag (klas S10) in ʼn tyd van 1:09.02. Michael Louwrens het derde in die gewigstoot (klas F57/58) geëindig en daarmee vir die land ʼn brons medalje verower. Sy beste afstand was 13.64m.
Suid-Afrika spog reeds met 15 medaljes waarvan 3 goud, 5 silwer en 7 brons en is in die 22ste plek.