Phyllis Naidoo
Die Daily News het berig dat Naidoo aan ʼn hartkwaal by die Albert Luthuli-hospitaal oorlede is. Sy is by ʼn privaat krematorium veras.
“Ons betreur haar afsterwe,” het Keith Khoza, woordvoerder vir die ANC, gesê.
Naidoo is op 5 Januarie 1928 in Estcourt, KwaZulu-Natal gebore. Sy het later by die Natal Indiese Kongres aangesluit en was betrokke by die SA Kommuniste Party. Sy en haar eggenoot het tydens apartheid talle mede-aktiviste gehelp om uit die land te kom. Naidoo is in 1966 deur die apartheidsregering verban.
In 1967 is haar man op Robbeneiland gevangene geneem en sy is onder huisarres geplaas. Sy het haarself in dié tyd as ʼn prokureur gekwalifiseer.
Van die aktiviste wat van Robbeneiland bevry is, het by haar om werk kom aanklop. Sy het in een stadium vyf oud-Robbeneiland gevangenes as boodskappers by haar prokureursfirma in diens gehad, insluitend pres. Jacob Zuma.
Sy het in 1977 na Lesotho verhuis en in 1983 na Zimbabwe voordat sy in 1990 teruggekeer het na Suid-Afrika.
Sy het sewe boeke, waaronder die “Footsteps”-reeks en Le rona re batho: An account of the 1982 Maseru Massacre” geskryf.
