Die 3-jarige brandslagoffer van Limpopo, Isabella (Pippie) Kruger, is wakker en haal op haar eie asem.
Dokters sê haar herstel vorder baie goed, berig RSG. Pippie het tydends ‘n gesinsbraai op Oujaarsaand verlede jaar brandwonde oor 80% van haar lyfie opgedoen. Sy het die afgelope paar maande in die hospitaal spandeer na dié fratsongeluk. Gekloonde vel is vroeër van Boston in Amerika ingevlieg en op gebrande dele van haar lyf oorgeplant. Die vel wat gekweek is moes binne 24 uur oorgeplant word. Sy het Vrydag begin wakker word nadat die toediening van verdowingsmiddels gestaak is.
Haar ouers, Anice en Erwin Kruger, sê Pippie sterk goed aan. Dr. Ridwan Mia, haar plastiese chirurg wat die operasie gedoen het, is tevrede en sê meer as 90% van die nuwe vel het suksesvol geheg.
Die dokters verwag dat haar fisioterapie dalk reeds aanstaande week sal kan begin.