Inwoners van Lyttelton Manor in Pretoria het Vrydag in die vroeë oggendure wakker geword met skote van ʼn skermutseling tussen die polisie en kitsbankrowers.
A.o. Hero Gubmu, ʼn polisiewoordvoerder van die Lyttelton-polisiestasie, het aan Maroela Media gesê ʼn groep van sowat ses rowers het met drie voertuie by die Cradock-winkelsentrum opgedaag en een ABSA-kitsbank opgeblaas. “Hulle was nog besig om die geld uit te haal toe beamptes van Lyttelton-polisiestasie op hulle toegesak het. Hulle het op die polisie losgebrand, waarna die polisie teruggevuur het,” het Gumbu gesê.
Die rowers het sonder enige kontant ontsnap. Hulle het in verskillende rigtings met die drie voertuie gevlug.
Die polisie het beslag gelê op R155 600. Niemand van die polisie is in die skietery beseer nie. Die polisie het ʼn soektog na die rowers van stapel gestuur.