Polisie moet opdok na hulle vrou glo aanrand

Die hooggeregshof in Pietermaritzburg, KwaZulu-Natal het die minister van polisie beveel om skadevergoeding aan ʼn vrou te betaal nadat sy glo in polisie-aanhouding aangerand is.

Waarnemende regter Piet Bezuidenhout en regter Rashid Vahed het Nathi Mthethwa, minister van polisie, beveel om die vrou R50 000 se skadevergoeding te betaal. Thulakele Ngubane beweer sy is met ʼn stok geslaan, geskop en gewurg terwyl sy in polisie-aanhouding was. Volgens Ngubane het die voorval plaasgevind toe sy deur die polisie ondervra is nadat daar in Oktober 2010 ʼn wapen in haar huis gevind is. Sy het drie dae later in die Msinga-landdroshof verskyn.