Argieffoto: Dominic Favre
ʼn Peperduur diamant is in die maag van ʼn vermeende dief ná hy dit Woensdag ingesluk het.
ʼn Chinese man het die diamant glo tydens ʼn internasionale diamantuitstalling in Sri Lanka ingesluk. Hy is in hegtenis geneem nadat die diamant se eienaar van die diefstal bewus geword het, berig Times Live.
Die verdagte het die diamant, met ʼn waarde van $14 000, geïnspekteer en dit skielik ingesluk. Die eienaar het die man aangehou totdat die polisie op die toneel gekom het. Die polisie het hom na ʼn hospitaal geneem waar hy lakseermiddels toegedien is in ʼn poging om die diamant terug te kry.
