Die minister van polisie, Nathi Mthethwa, het gewaarsku dat polisiebeamptes dissiplinêre optrede teen hulle kan verwag indien hulle nie akkurate verklarings afneem nie.
“Die tipe foute kan ʼn saak maak of breek. Ons sal nie met die lewens van ons burgers dobbel nie,” het Mthetwa geantwoord op ʼn parlementêre vraag. Mthethwa is gevra wat hy doen om te verseker dat verklarings wat deur polisiebeamptes afgeneem word, aan hofprosedures onderwerp sal kan word. Hy sê alle polisiebeamptes wat se verklarings deur ʼn hof verwerp word, sal ʼn mentor kry en opleiding ondergaan. Polisiebeamptes sal opgelei word in alle elemente van misdaad, van die beskrywing van getuies, verdagtes, misdaadtonele en om alle noodsaaklike inligting van die klaer te kry. Mthethwa sê die wyse waarop polisiebeamptes verklarings afneem het ʼn groot invloed op kriminele vervolgings. Hy sê vaardighede daarin is dus noodsaaklik.
