Drie rowers is vroeg Maandagoggend in Soweto doodgeskiet ná ʼn skietgeveg met die polisie.
Volgens McIntosh Polela, die valke se woordvoerder, het die polisie ʼn wenk ontvang dat ʼn groep gewapende mans ʼn Cashbuild-winkel wou beroof.
Die polisie het die groep rowers ingewag. Van die rowers het op die polisie begin skiet waarop die polisie terug geskiet het. Drie van die rowers is op die toneel dood. Een van dié mans was ʼn moordverdagte wat op borgtog vrygelaat was. Een man is in die been geskiet en is tans in die hospitaal onder die polisie se toesig. Twee mans is in hegtenis geneem. Volgens Polela is die polisie steeds op soek na vier mans wat ontsnap het.
Die polisie het beslag gelê op ʼn voertuig en ʼn vuurwapen.