Polisie staan Oscar Pistorius se VSA-ondersoekers by

Oscar Pistorius op 19 Augustus 2013 in die Pretoriase landdroshof Foto: Werner Beukes/SAPA

Oscar Pistorius op 19 Augustus 2013 in die Pretoriase landdroshof Foto: Werner Beukes/SAPA

Die Suid-Afrikaanse polisie staan die Amerikaanse forensiese ondersoekbeamptes wat spesiaal deur die moord-beskuldigde Oscar Pistorius aangestel is om vir sy verdediging voor te berei, by in hul ondersoek.

Lt. genl. Solomon Makgale, ʼn polisiewoordvoerder, het Donderdag gesê Pistorius se huis in die ooste van Pretoria is nie meer ʼn moordtoneel nie. Pistorius word daarvan verdink dat hy sy meisie, die model Reeva Steenkamp, met voorbedagte rade daar doodgeskiet het op Valentynsdag vanjaar. Hy voer egter aan dat hy haar as ʼn misdadiger aangesien het.

Makgale het gesê Pistorius se ondersoekbeamptes het sy huis Maandag besoek. Hulle het vooraf reëlings met die polisie getref. “Die rede vir hul besoek was om toegang tot die badkamerdeur te verkry en om die misdaadtoneel te rekonstrueer.”

Die polisie se ondersoekbeampte asook ʼn ballistiese kenner van die polisie was teenwoordig.

Makgale het gesê Pistorius se span is later beheerde toegang tot alle bewysstukke gegun. “Pistorius se span het geen bewyse uit die polisie se stoorgeriewe geneem nie. Hulle is ook in geen stadium alleen gelos met enige van die bewysstukke nie,” het hy gesê.

“Volgens wet is die staat verplig om enige bewysstukke wat in sy besit is, aan beskuldigdes te verskaf as hulle dit versoek. Dit laat die beskuldigdes toe om vir hul verdediging voor te berei.”

Lees ook:
Oscar Pistorius kry forensiese kenners van VSA

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

2 Kommentare

Erich Goosen ·

Ek dink die opskrif is misleidend. Deur te se Pistorius se span word bygestaan impliseer dat hulle ‘gehelp’ word. Miskien moes die opskrif gelui het: ‘Pistorius se regspan word toegang tot bewysstukke verleen’.

Eben ·

Stem Erich …. dit klink so of ons ouens ‘slim’ is en opleiding verskaf!

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.