Die polisie in Limpopo het Donderdag gesê hulle is nie bewus van enige rondloperleeu in Makhado (Louis Trichardt) nie.
“Ons het navrae ontvang oor ‘n leeu. Ek was met Maano Sedike, woordvoerder van die Makhado-polisie, in verbinding. Ons is nie bewus van enige rondloperleeu nie,” het brig. Hangwani Mulaudzi, woordvoerder van die polisie in Limpopo, gesê.
Agence France Presse het berig dat ‘n leeu uit ‘n privaatwildreservaat ontsnap het en inwoners van Makhado al vir ‘n week lank terroriseer. “Ons is in kennis gestel dat ‘n mannetjiesleeu by Safari Lodge buite Makhado verlede week ontsnap het,” het polisiewoordvoerder Nechindamatsi Marubeni volgens AFP glo gesê. “Die leeu is Woensdag laas gesien en ons soekparty het nog nie die leeu kon vang nie,” het AFP verder vir Marubeni aangehaal. Hy het glo ook gesê “dit is ‘n uitgegroeide mannetjie met ‘n groot kop”.