‘n Polisiebeampte is Sondagaand in Johannesburg doodgeskiet nadat hy sy broer, wat glo aangerand is, probeer help het.
Volgens luitenant-kolonel Lungelo Dlamini, ʼn polisiewoordvoerder, was Eric Mthanti (30) van diens af toe die voorval in Rondebult, Alberton, plaasgevind het.
“Mthanti het gereageer op ʼn oproep van sy broer, wat glo in ʼn bakleiery met twee mans betrokke was. Mthanti was besig om uit sy voertuig te klim toe verskeie skote op hom gevuur is. Hy is noodlottig gewond en is op die toneel dood verklaar,” het Dlamini gesê.
Die mans het sy dienspistool gesteel en weggehardloop. Hulle is steeds soek.
