ʼn Polisiebeampte wat nie aan diens was nie, is oor die naweek in Port Elizabeth in die Oos-Kaap doodgeskiet.
Kaptein André Beetge, ʼn polisiewoordvoerder, sê die beampte is vroeg Saterdagoggend buite ʼn kuierplek doodgeskiet.
“Hy was in ʼn kroeg toe hy ʼn oproep ontvang het. Hy het na buite gegaan om die oproep te beantwoord waarna hy vier keer geskiet is. Hy is in sy kop en nek geskiet en is op die toneel dood,” het Beetge gesê.
Die beampte is as konstabel Lindile Gacexa uitgeken wat by die New Brighton-polisiestasie gestasioneer was.
Niemand is nog in verband met die voorval in hegtenis geneem nie.