ʼn Oos-Kaapse polisieman het so ver gegaan as om in ʼn put vol riool te spring om ʼn pasgebore babatjie te red.
Die dogtertjie, wat die bynaam Mpho gegee is, sterk tans in die Humansdorp-hospitaal aan ná haar ma haar glo in ʼn buitetoilet se put gegooi het.
Volgens Adjudant-offisier Gerda Swart, ʼn woordvoerder van die polisie in die Oos-Kaap, het die polisie Mpho, wat geskenk beteken, Woensdagmiddag gered.
Patensie-polisie het omstreeks 17:45 ʼn oproep van ʼn inwoner ontvang wat sê hy hoor ʼn babatjie in die buitetoilet huil.
Die polisie het gaan ondersoek instel en in die toilet se put gekyk waar hulle die babatjie skoppend en huilend gekry het.
Konstabel Frankie Williams het in die put ingespring en die baba uit die riool gered. Die beamptes het die babatjie skoongemaak en in ʼn handdoek toegedraai en na die hospitaal gehaas.
“Die babatjie het brandmerke op haar vel gehad as gevolg van die suur in riool,” het Swart gesê.
Die 25-jarige ma is Donderdag in hegtenis geneem. Sy het Vrydag in die hof verskyn vir poging tot moord. Sy is op borgtog van R500 vrygelaat en die saak kom weer op 12 Junie in die hof voor.