Premier reageer op Puk-groet

Koshuisgroet

‘n Skermskoot uit ‘n koshuisgroet-video.

Thandi Modise, premier van Noordwes, het Saterdag haar skok uitgespreek oor berigte dat studente by die provinsie se universiteit in Potchefstroom die Nazi-saluut gebruik het.

“Dit is ontstellend, aangesien dit ʼn aanduiding is dat ʼn segment van ons jong, witmense steeds kwesbaar is vir etniese en rassistiese indoktrinasie,” het Modise in ʼn verklaring gesê. “Ons het as Suid-Afrikaners al ʼn lang pad gestap, bykans 20 jaar, om die septer van rassisme en etnisiteit in al sy manifestasies neer te lê.”

Beeld het Vrydag berig dat sommige studente die “Sieg Heil”-saluut tydens ʼn ontvangs- en bekendstellingsprogram aan die Noordwes-Universiteit (NWU) se Puk-kampus in Potchefstroom gebruik het.

Volgens die koerant ondersoek die universiteit die saak.

Blade Nzimande, minister van hoër onderwys, sal ook na verwagting volgende week ʼn plan van aksie aankondig.

Modise het Saterdag gesê die provinsiale regering sal die gebeure by die Puk monitor. “Ons kan nie bekostig om aan enige sentiment blootgestel te word wat die voorskrifte van ons grondwet ondermyn nie,” het sy gesê. “Ons is bemoedig deur die flinke optrede deur die bestuur van die universiteit oor die voorval.”

‘n Hewige debat het intussen in die media en op sosiale media losgebreek oor die voorval.

Flip Buys, uitvoerende hoof van Solidariteit, het Vrydag gesê hy is bekommerd dat dié uitlatings die toekoms van Afrikaans op die Puk kan raak. “Die prys van ‘n redakteur se persoonlike agenda en vendetta kan die toekoms van die laaste Afrikaanse kampus wees,” het Buys gesê. “Sy [die redakteur se] veldtog lyk meer na ‘n misplaaste poging om die koerant se dalende sirkulasie te verbeter as om menseregte-vergrype te ontbloot.” Klik hier om meer te lees.

Adriaan Basson, redakteur van Beeld, het in reaksie op Buys se kommentaar op Twitter geskryf: “Flip Buys dink blykbaar mens kan Afrikaans ‘red’ met ‘n Nazi-saluut. Soveel denkfoute in sy reaksie.” Hy het later op Twitter aan Dirk Hermann, adjunk uitvoerende hoof van Solidariteit, bevestig hy sal in sy Maandag-rubriek in Beeld puntsgewys op Buys se reaksie kommentaar lewer. Klik hier om meer te lees.

Huidige en voormalige studente van die Puk het intussen ook spontaan met “#puktradisies” op Twitter hul positiewe herinnerings en ervarings van die Puk met die wêreld begin deel. Ander het spottenderwys verwys na dié groet wat, volgens hulle, al vir baie jare op die Puk gebruik word sonder enige Nazi-verbintenis. Klik hier om meer te lees.
–SAPA

Lees ook:
Puk-groet: Twitter-vermaak terwyl storm woed
Debat oor Puk-groet: ‘n G*tslag vir Afrikaans?
Puk-rektor sê oor ‘Nazi-saluut’

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

30 Kommentare

jongste oudste gewildste
Frederick J Smith

Hierdie is werklik n skokkende voorval! Tot watter uiterstes toe sal ons Moedertaal veral,nog gekastei word…en dan nog uit onverwagte oorde soos Beeld wat ons taal handhaaf,moet uitbou en bevorder.Ek sak net my kop in skaamte en hoop hierdie “skade” kan herstel word…sonder n bittere duur prys,ons Moedertaal!!

Jasper

Die media en al wat kokkedoor is ruk nou heeltemal die dam onder die eende uit. Gee eerder aandag aan Julias en andere se aanhoudende haatspraak en blatante aanhitsing.
Beeld het met dieselfde AFRIKANER wat hul so lekker afkraak se geld tot stand gekom.
Staan saam en boikot die gemors. Daar is baie ander maniere om suiwer en nie misleidende nuus te bekom.

Louis Pretorius

Baie studente het nog net gehoor van die Nazies en weet iets van die 2de wêreldoorlog. Hulle is onkundig en die “saluut” maak nie van hulle Nazies nie. Die saluut is onskuldig en word uit verband geruk. Die redakteur en sy persoonlike sienings is belaglik en soek net sensasie. Dalk wil hy by die rassistiese ANC aansluit en kruip hy nou gat by hulle. Hy is n verleentheid vir ons afrikaners. So n man moet net geignoreer word dan sal sienings n vinnige food sterf

Louis Pretorius

Baie studente het nog net gehoor van die Nazies en weet iets van die 2de wêreldoorlog. Hulle is onkundig en die “saluut” maak nie van hulle Nazies nie. Die saluut is onskuldig en word uit verband geruk. Die redakteur en sy persoonlike sienings is belaglik en soek net sensasie. Dalk wil hy by die rassistiese ANC aansluit en kruip hy nou gat by hulle. Hy is n verleentheid vir ons afrikaners. So n man moet net geignoreer word dan sal sienings n vinnige dood sterf

ryno

ja, jy kon dit nie beter stel nie.

Dis onskuldige kinder pret. En siende dat niemand gewond of swanger is nie, kan ek nie juis sien dat hierdie gaan ly tot n volskaalse volksmoord en n 3rde wereld oorlog nie.