ʼn Priester is in Vrischgewagte naby Mafikeng op ʼn aanklag van moord in hegtenis geneem, het Noordwes-polisie Saterdag gesê.
Brigadier Thulani Ngubane het gesê die priester het glo Donderdag aan vier vroue ʼn brousel gegee wat hulle glo moes gesond maak. “Twee vroue is dood en twee word in die Gelukspan-hospitaal behandel nadat hulle die brousel gedrink het.” Volgens Ngubane het die priester die vroue ʼn mengsel van sterk alkohol, kakao en rissies gegee om te drink. Hulle het later begin kla van maagpyn. Die priester sal Maandag in die Atamelangse landdroshof verskyn.
