Die polisie in Mpumalanga sê 19 mense, waaronder ses polisiebeamptes en 13 beamptes van die departement van binnelandse sake, is in hegtenis geneem vir korrupsie.
ʼn Polisiewoordvoerder, kapt. Leonard Hlathi, sê die verdagtes het na bewering omkoopgeld van buitelanders aanvaar om hulle in die land toe te laat. Hlathi sê die buitelanders het onwettig by die Lebombo grenspos, naby Komatipoort, die land binnegekom. Hy sê die 13 beamptes van binnelandse sake is reeds afgedank. Die verdagtes is in hegtenis geneem gedurende ʼn gesamentlike operasie van die polisie en die departement van binnelandse sake. Die verdagtes sal na verwagting Maandag in die landdroshof op Komatipoort verskyn op aanklagte van korrupsie.