Rekordgetal renosters reeds vanjaar gestroop

ʼn Rekordgetal renosters is reeds vanjaar in Suid-Afrika vir hul horings doodgemaak volgens statistiek wat Sondag op Wêreldrenosterdag bekend gemaak is.

Volgens die statistiek is 688 renosters reeds vanjaar in Suid-Afrika gestroop. Die departement van omgewingsake sê 425 renosters is reeds vanjaar in die Krugerwildtuin vir hul horings doodgemaak. Edna Molewa, minister van omgewingsake, het Saterdag aan ʼn optog in Pretoria deelgeneem waartydens jongmense hul steun vir die bekamping van renosterstropery gewys het. Molewa het gesê die regering sal nie toelaat dat renosters uitsterf nie. ʼn Totaal van 668 renosters is verlede jaar in Suid-Afrika vir hul horings doodgemaak.