Renosterkoei en kalf in Krugerwildtuin doodgeskiet

ʼn Witrenosterkoei en haar kalf is in Pretoriuskop in die Krugerwildtuin deur stropers doodgeskiet.

ʼn Woordvoerder van die Krugerwildtuin, William Mabasa, sê die koei en kalf se karkasse is Dinsdagoggend naby Albisini weg in die Pretoriuskop-gebied gevind. Mabasa sê dit is nie duidelik wanneer die renosters doodgemaak is nie. Hy sê die koei en haar kalf is albei in die kop geskiet en die koei se horing is verwyder. Mabasa het ʼn beroep gedoen op die publiek om na vore te kom indien hulle enige inligting het.