Rioolpyp-moord: Wag kry lewenslank

Jimmy Mahlaba (26) is Dinsdag in die hooggeregshof in Pretoria tot lewenslange tronkstraf gevonnis vir die moord op Denise Stratford (55).

Stratford se liggaam is in November 2011 in ʼn rioolpyp by die Mooikloof-kantoorpark, oos van Pretoria, gevind. Sy het verdrink nadat Mahlaba haar drie keer geskiet het en by die rioolpyp afgegooi het. Mahlaba was ʼn veiligheidswag by die Mooikloof-kantoorpark waar Stratford as ʼn kantoorbestuurder gewerk het. Stratford se seuns, Brandon (29) en Duane (32), het die trane weggevee terwyl hul pa, Trevor, getuig het oor hoe die moord hulle gesin se lewe verwoes het. Hy het sy vrou as barmhartig en plesierig beskryf en sê sy het geleef vir haar kleinkinders. Op ʼn vraag aan Stratford oor of hy Mahlaba sal kan vergewe vir die moord op sy vrou het hy gesê hy glo in ʼn “oog vir ʼn oog en ʼn tand vir ʼn tand” vir iemand wat so gruwelike en afskuwelike misdaad gepleeg het.

Stratford se motor is in Mahlaba se besit gevind en haar bloed was op sy skoene en klere. Hy beweer dat sy kollega Obed Chauke vir Stratford vermoor het. Mahlaba het die polisie daarvan beskuldig dat hulle hom gemartel het en hom gedwing het om die moordtoneel uit te wys. Regter Nico Coetzee het Mahlaba se getuienis verwerp. Hy sê dit is duidelik dat Stratford se seuns nog nie vrede kon maak met wat gebeur het nie. “Hulle het ʼn liefdevolle ma wat omgegee het verloor. Sy het die beskuldigde geen leed aangedoen nie. Hy het haar vermoor omdat hy gulsig was. Gierigheid was die motief.”